Qeveria paralajmëron largimin e UNMIK-ut nga përfaqësimi në CEFTA, Bislimi: Zhvillim shumë pozitiv, shpresoj që kjo frymë të bartet edhe në dialog

Zëvendëskryeministri i vendit, Besnik Bislimi ka folur sot rreth paraqitjes së Kosovës në CEFTA, gjersa paralajmëroi se do të vendoset që Kosova të mos përfaqësohet më nga UNMIK-u.  

Bislimi tha se këtë e sheh si zhvillim shumë pozitiv, sidomos meqë bëhet në Beograd.

“Kosova promovon tregtinë e lirë dhe beson në përparësitë që sjell tregtia e lirë në rajon. Ka qenë Serbia që përmes barrierave jo-tarifore ka penguar eksportin e Kosovës drejt Serbisë”, tha ai, duke shtuar se eksportuesit e Kosovës kanë dëshmuar se shumë më lehtë është që të eksportojnë në vendet e largëta sesa në Serbi për shkak të barrierave.

Ai ka folur edhe për largimin e masave kufizuese ndaj mallrave nga Serbia.

“Ajo që ka ndodhur është hapja e një pike kufitare, por me kontrolle të shtuara të sigurisë…. për arsye se edhe për BE-në është e qartë se siguria është më e rëndësishme se liria e mallrave dhe kapitaleve…”, tha zëvendëskryeministri, raporton Telegrafi.

Bislimi tutje paralajmëroi se sot me propozimin e palës do të votohet që UNMIK përfundimisht të largohet nga përfaqësimi i Kosovës në CEFTA.

“Ndërkaq, sot mu në Beograd do të votohet me propozimin e palës serbe që UNMIK-u përfundimisht të largohet nga përfaqësimi në CEFTA. Unë e shoh si zhvillim shumë pozitiv, sidomos meqë bëhet në Beograd, diçka që nuk ka ndodh për shumë vite.

Dhe shpresoj që kjo frymë konstruktive e Serbisë e cila e kupton se realiteti ka ndryshuar do të bartet edhe në dialog në mënyrë që t’i bindim palën se marrëveshja e Brukselit dhe Ohrit duhet të zbatohet në tërësi…”, tha ai.

Në Beograd po mbahet takimi i Marrëveshjes së Tregtisë së Lirë të Evropës Qendrore (CEFTA), gjersa pritet të votohet që Kosova të mos përfaqësohet më nga UNMIK-u.

Lidhur me këtë, kryeministri Albin Kurti në konferencën për media tha se Kosova në këtë takim online do të përfaqësohet nga ministrja e Tregtisë dhe Industrisë, Rozeta Hajdari.

Ndryshe, zëvendëskryeministri gjatë konferencës për media tutje njoftoi se emisari i BE-së, Miroslav Lajçak është duke punuar drejt caktimit të një takimi ndërmjet dy kryenegociatorëve, por që ende nuk ka datë.

Bislimi tutje tha se me emisarin Lajçak do të takohet nesër (të enjten). /Telegrafi/