Putin thotë se Rusia nuk do të sulmojë NATO-n, por kjo nuk vlen për aeroplanët F-16 që dërgohen në Ukrainë

Rusia nuk ka plane për të sulmuar ndonjë vend të NATO-s dhe nuk do të sulmojë Poloninë, shtetet baltike apo Republikën Çeke, por nëse Perëndimi furnizon Ukrainën me aeroplanë luftarakë F-16, atëherë ata do të rrëzohen nga forcat ruse.

Kështu, siç raportojnë mediat e huaja, përcjell Telegrafi, ka thënë të mërkurën presidenti Vladimir Putin.

Pushtimi rus i Ukrainës në shkurt 2022 ka shkaktuar krizën më të thellë në marrëdhëniet e Rusisë me Perëndimin që nga kriza e raketave Kubane e vitit 1962.

Duke folur me pilotët e forcave ajrore ruse, Putin tha se aleanca ushtarake e udhëhequr nga SHBA ishte zgjeruar në lindje drejt Rusisë që nga rënia e Bashkimit Sovjetik në vitin 1991, por se Moska nuk kishte plane të sulmonte ndonjë shtet të NATO-s.

“Ne nuk kemi synime agresive ndaj këtyre shteteve”, citohet të ketë thënë Putin, sipas një transkripti të Kremlinit të lëshuar të enjten.

Lexo po ashtu SHBA kërkon të ndalojë eksportet e kompanive, mallrat e të cilave mund të përfundojnë në Rusi

“Ideja se ne do të sulmojmë një vend tjetër – Poloninë, shtetet baltike dhe çekët po tremben gjithashtu – është absurditet i plotë. Është thjesht një nxitje”.

Kremlini, i cili akuzon SHBA-në se po lufton kundër Rusisë duke mbështetur Ukrainën me para, armë dhe inteligjencë, thotë se marrëdhëniet me Uashingtonin ndoshta nuk kanë qenë kurrë më keq.

Dhe i pyetur për aeroplanët luftarakë F-16 që Perëndimi ka premtuar t’i dërgojë në Ukrainë, Putin ka thënë se aeroplanët e tillë nuk do ta ndryshonin situatën në Ukrainë.

“Nëse ata e furnizojnë me F-16, dhe ata po flasin për këtë dhe me sa duket po trajnojnë pilotë, kjo nuk do të ndryshojë situatën në fushën e betejës”.

“Dhe ne do të shkatërrojmë aeroplanët ashtu siç shkatërrojmë sot tanke, automjete të blinduara dhe pajisje të tjera, duke përfshirë raketa të shumta”.

Deklaratat e Putinit pasuan komentet më herët gjatë ditës nga ministri i Jashtëm ukrainas Dmytro Kuleba se aeroplanët duhet të mbërrijë në Ukrainë në muajt e ardhshëm. /Telegrafi/