Putin nënshkruan ligjin për mobilizimin edhe të rusëve që kryen krime të rënda

Presidenti rus Vladimir Putin ka nënshkruar një ligj që lejon mobilizimin edhe të njerëzve që kanë kryer krime të rënda.

Kjo përfshin ata të cilëve u janë fshirë të dhënat, si dhe ata me dënime ekzistuese, shkruajnë mediat e huaja, përcjell Telegrafi.

Por Ligji përjashton ata të dënuar për abuzim seksual të fëmijëve, tradhti, spiunazh ose terrorizëm.

Përjashtohen gjithashtu ata që janë dënuar për tentativë vrasjeje të një zyrtari qeveritar, rrëmbim avioni, aktivitet ekstremist dhe trajtim të paligjshëm të materialeve bërthamore dhe substancave radioaktive.

Putin pretendoi gjithashtu të premten se Rusia kishte mobilizuar 318,000 njerëz në forcat e saj të armatosura, raportoi Interfax.

Kjo tejkalon objektivin fillestar prej 300,000 të vendosur nga Ministri i Mbrojtjes, Sergei Shoigu.

Ndryshe, Putini më 21 shtator njoftoi një “mobilizim të pjesshëm” mes një sërë pengesash ushtarake në Ukrainë.

Nga 300,000 që u thirrën si pjesë e mobilizimit të pjesshëm, 87,000 u dërguan në vijat e frontit në Ukrainë, tha të enjten ministri rus i Mbrojtjes, Sergei Shoigu.

Rusia ka mbledhur gjithashtu të burgosur dhe qytetarë të cenueshëm për të shërbyer në kompaninë ushtarake private ruse Wagner Group, e cila aktualisht po vepron së bashku me forcat e armatosura të rregullta ruse.

Ndërkohë, Ministria e Mbrojtjes e Ukrainës raportoi më 25 tetor se të burgosurit me HIV dhe Hepatit C ishin rekrutuar nga Grupi Wagner.

Grupi Wagner, sipas Drejtorisë Kryesore të Inteligjencës të Ukrainës (GUR), përbëhet kryesisht nga ish-të dënuar rusë, të cilët janë rekrutuar jashtë burgut. /Telegrafi/