Pse qeni juaj vazhdon të largohet nga oborri?

Nëse qeni juaj duket se është i vendosur të shpëtojë nga oborri juaj dhe të ikë, duhet të kuptoni pse.

Ju e lini qenin tuaj në oborrin e shtëpisë për të vrapuar dhe për të kryer nevojat. Kur vështroni pak kohë më vonë, e shihni në oborrin e fqinjit, ose duke vrapuar në një fushë përtej pronës tuaj.

Nuk është hera e parë që kjo ka ndodhur. Pasi ta thërrisni përsëri, ju vëreni se qeni juaj ka hapur një vrimë. Pse e bëri këtë, kur oborri yt duket kaq i bukur dhe si mund ta ndalosh që të largohet?

Çdo gjë në anën tjetër të gardhit duket shumë më argëtuese sesa ajo që ndodhet brenda te shumica e qenve. “Qentë janë kafshë shoqërore”, thotë Dr. Nicholas Dodman. “Shpresa për argëtim është nga jashtë. Është sikur ka një magnet jashtë gardhit”.

Dy arsye pse qentë duan të dalin jashtë:

Të shpëtoj nga diçka

Disa qen kanë frikë ndaj zhurmave të forta, veçanërisht stuhive. Qentë e frikësuar do të bëjnë gjithçka për të shpëtuar nga një hapësirë ​​e mbyllur dhe janë të njohur për të thyer pengesat kur janë të frikësuar. Nëse qeni juaj ka frikë nga stuhia apo zhurma të tjera të forta, të tilla si ndërtimi i rrugëve ose kamionë transporti, mbajeni atë brenda në shtëpi me ju dhe nxirreni vetëm në zinxhir, edhe kur oborri juaj është i rrethuar.

Të arratisen drejt diçkaje

Në shumë raste, qentë ikin nga oborret e tyre sepse ka diçka jashtë që është më tërheqëse sesa territori i shtëpisë së tyre. Arsyeja kryesore për të ikur është të ndjekësh diçka. Disa qen janë të pandalshëm dhe kanë shtytje të forta për të ndjekur ose mbledhur krijesa të tjera si ketrat, lepujt, dreri, apo edhe bagëtia. Arsye të tjera për t’u larguar nga oborri mund të përfshijnë joshjen e grumbullit të plehut të dikujt, ose shikimin e qenve dhe njerëzve të tjerë. Nëse keni një qen mashkull të pa kastruar, ai mund të jetë në kërkim të partneres. /Telegrafi/