Pse Gjermania ka hyrë në recesion?

Analistët shqetësohen se ekonomia gjermane mund të bëhet “delja e zezë e Evropës”.

Gjermania ka hyrë në recesion në tremujorin e parë të vitit 2023, duke e vënë ekonominë më të madhe të Evropës jashtë hapit me pjesën tjetër të kontinentit.

Shifrat e rregulluara sezonale nga instituti kombëtar i statistikave, Destatis, plotësojnë përkufizimin teknik të një recesioni: dy tremujorë radhazi të tkurrjes ekonomike.

Kjo e vendos Gjermaninë në recesion për herë të parë që nga rënia e GJDP-së në tremujorin e parë dhe të dytë të vitit 2020, kur pandemia COVID-19 filloi të kafshojë, raporton euronews.

Me konsumatorët dhe bizneset gjermane të goditur nga inflacioni i lartë dhe rritja e normave të interesit, Prodhimi i Brendshëm Bruto (GJDP) i vendit ra me 0.3 për qind midis janarit dhe marsit – pas një rënie prej 0.5 për qind midis tetorit dhe dhjetorit të vitit të kaluar.

Pra, pse po ndodh kjo?

Nën presion

Rënia vjen veçanërisht nga rënia e konsumit të brendshëm si pasojë e inflacionit.

Njerëzit thjesht janë duke shtrënguar rripat, me çmime të larta që do të thotë se ka më pak para për në qarkullim.

Inflacioni mbetet shumë i lartë në më shumë se 7.2 për qind në muajin prill, pavarësisht një rënie graduale.

Në krye të listës së faktorëve që nxisin rritjen e çmimeve është lufta në Ukrainë, transmeton Telegrafi.

How is the war in Ukraine affecting the cost of living crisis? #ThisWillImpactYourLife https://t.co/slfnoAIBSA

— euronews (@euronews) June 1, 2022

Industria gjermane, e varur prej kohësh nga gazi i lirë rus, u godit rëndë vitin e kaluar pasi Moska nisi pushtimin e saj fatkeq në shkurt 2022. Furnizimet u ndërprenë dhe çmimet u rritën.

Megjithatë, ekonomia në fillim dukej se po qëndronte më mirë se sa pritej në fillim të vitit, falë ndihmës masive publike, rritjes së përdorimit të gazit të lëngshëm dhe rënies së çmimeve të gazit që nga vjeshta.

Industria gjithashtu përfitoi nga rihapja e Kinës nga kufizimet e COVID-19 dhe një lehtësim i vështirësive të furnizimit në tregjet ndërkombëtare, duke rritur eksportet.

Rritjet e vazhdueshme të Bankës Qendrore Evropiane për rritjen e normave të interesit për të luftuar inflacionin ka vënë një frenim të konsiderueshëm në aktivitet.

Partnerët tregtarë të vendit importuan më pak produkte “Made in Germany” se zakonisht.

Shkaku, “turbulenca gjeopolitike, norma të larta inflacioni dhe humbja e fuqisë blerëse”, sipas institutit ekonomik DIHK.

Dele e zezë

Pavarësisht këtij ngadalësimi, qeveria gjermane mbetet optimiste, me një parashikim të rritjes prej 0.4 për qind në vitin 2023.

“Perspektiva për ekonominë gjermane është shumë e mirë dhe ne jemi në proces të tejkalimit të sfidave me të cilat përballemi”, siguroi shtypin kancelari gjerman, Olaf Scholz.

Ministria e tij e Ekonomisë foli për një “dimër të dobët” përpara se të pritej “një përmirësim i qartë” më pas.

Por, jo të gjithë janë aq optimistë.

Fondi Monetar Ndërkombëtar (FMN) parashikoi në muajin prill se aktiviteti ekonomik gjerman do të tkurret me 0.1 për qind këtë vit, përpara se të rimëkëmbej me 1.1 për qind në vitin 2024.

Situata gjermane qëndron në kontrast me fqinjët e saj evropianë, ku rreziku i recesionit është zbehur gradualisht falë çmimeve më të ulëta të energjisë.

Në Belgjikë dhe Francë, aktiviteti ekonomik u rrit përkatësisht me 0.4 për qind dhe 0.2 për qind në tremujorin e parë të vitit 2023 krahasuar me tremujorin e mëparshëm. Italia pa një rritje të GJDP-së me 0.5 për qind.

Edhe Britania e Madhe, e cila ka ngecur në acarimin ekonomik për disa kohë, mori disa lajme të mira këtë javë: FMN parashikoi se nuk pritet të bjerë në recesion këtë vit në fund të fundit.

Siç tha Guillaume Dejean, një analist për Global Market Insight se “Gjermania shihet gjerësisht si dele e zezë e mundshme e Evropës”. /Telegrafi/