Alberto Costa mbetet i vetmi nënshkrim i janarit i Juventusit që nuk ka bërë ende debutimin e tij për klubin, me trajnerin Thiago Motta që ka një qasje të kujdesshme për arsye taktike – edhe pse kjo mund të ndryshojë së shpejti.
Mbrojtësi i djathtë portugez është ulur në stol për gjashtë ndeshje radhazi që kur u transferua në “Allianz Stadium” gjatë afatit kalimtar të dimrit.
Një vendim që ngjalli shumë pyetje duke marrë parasysh investimin prej 15 milionë eurosh që Bianconerët bënë për nënshkrimin e tij nga Vitória SC.
Ndërsa të ardhurit e tjerë të rinj, si Randal Kolo Muani, Lloyd Kelly dhe Renato Veiga, kanë pasur tashmë mundësi, Alberto Costa duket se po kërkon më shumë kohë për të fituar besimin e trajnerit të tij.
Sipas Il Bianconero, Thiago Motta dhe stafi i tij po punojnë intensivisht për forcimin e aftësive mbrojtëse të 21-vjeçarit, gjë që konsiderohet vendimtare për integrimin e tij në sistemin taktik të Juventusit.
Megjithatë, pritja pritet të përfundojë së shpejti, pasi raportet tregojnë se Alberto Costa mund të bëjë paraqitjen e tij të parë në çerekfinalen e Kupës së Italisë kundër Empolit në “Allianz Stadium”.
Ndërsa Timothy Weah dhe Andrea Cambiaso pritet të startojnë, mbrojtësi portugez mund të marr kohën e tij si zëvendësues, në varësi të mënyrës se si do të zhvillohet ndeshja. /Telegrafi/
