Provim shtetëror për mësimdhënësit fillestarë, flasin ekspertët e arsimit

Dukagjin Pupovci, zëvendësministër i Arsimit, Shkencës, Teknologjisë dhe Inovacionit, ditë më parë ka bërë të ditur se ky dikaster ka në plan që të fillojë zbatimin e Ligjit për profesionet e rregulluara, që parasheh një lloj provimi shtetëror edhe për mësimdhënësit fillestar, për të cilin ligj ekspertët e fushës së arsimit e vlerësojnë si të vonuar, duke kërkuar kështu zbatimin e saj.

Bardha Qirezi nga Edutask në një prononcim për Telegrafin ka thënë se licencimi i mësimdhënësve kontribuon në ngritjen e cilësisë në arsim.

Sipas saj, shpeshherë punësimet e mësimdhënësve në Kosovë kanë anashkaluar kërkesat profesionale dhe siç theksoi Qirezi, licencimi i mësimdhënësve do të garantonte që mësimdhënësit të cilët nuk i plotësojnë kushtet të mos punojnë në profesionin e tyre.

“Sipas mendimit tim, licencimi i mësimdhënësve kontribuon në ngritjen e cilësisë në arsim. Shpeshherë punësimet e mësimdhënësve në Kosovë kanë anashkaluar kërkesat profesionale dhe licencimi mësimdhënësve do të garantonte që asnjë mësimdhënës që nuk i ka plotësuar kushtet e profesionit të mos mund të punojë në atë profesion. Po ashtu do të përkrahte mobilitetin e mësimdhënësve. Shpeshherë mësimdhënësit punësohen nga komuniteti/komunat përkatëse duke lënë anash profesionist të cilët kanë kualifikime më të larta dhe përvojë”, vlerësoi ajo.

Qirezi po ashtu tha se sipas Ligjit për profesionet e rregulluara në Republikën e Kosovës mësimdhënësit në arsimin parauniversitar duhet: të përfundojnë studimet përkatëse apo kualifikimet profesionale, përfundojnë praktikën profesionale, kryejnë provimin shtetëror dhe të regjistrohen në organin përkatës profesional.

Lexo po ashtu Ministria e Arsimit ka në plan një lloj provimi shtetëror për mësimdhënësit fillestarë

Mirëpo, Qirezi po ashtu theksoi se: “Parakusht për të funksionalizuar këtë ligj është që të kemi të miratuara standardet për profesionin e mësimdhënësit, të hartuara nga organi kompetent përkatës për zhvillimin e standardeve profesionale; Organet që duhet të jenë funksionale sipas këtij ligji janë: Këshilli Shtetëror për Profesione të Rregulluara (KSHPRr) dhe Agjencia Shtetërore e Provimeve të Kosovës(ASHPK)”.

Licencimi i mësimdhënësve siç u shpreh ajo ndërlidhet edhe me kushtet për llojin e studimeve për angazhimin në lëndë të caktuara, si: “akreditimin e programeve të dedikuara për mësimdhënës, ku kërkohet të ketë edhe praktikë profesionale si dhe llojet e licencave që parashihen për hyrje në profesion si dhe për avancimin e vazhdueshëm në karrierë”.

Me aq sa është prezantuar në publik, Qirezi tha se MASHT synon të zbatoj ligjet dhe udhëzimet administrative të aprovuara tashmë për hyrje në profesionin e mësimdhënësit.

“Zbatimi efikas i këtyre procedurave kërkon një angazhim serioz i cili krijon besueshmëri në publik. Në shumicën e vendeve profesioni i mësimdhënësit konsiderohet profesion i rregulluar ku nevojitet një licencë. Disa shtete kanë edhe kërkesa tjera shtesë si verifikimi kriminal dhe shëndetësor. Standardet evropiane kërkojnë që kualifikimi mësimdhënësit duhet të kombinojë njohurinë mbi lëndën (ët) e caktuar (a), njohuritë për metodat e mësimdhënies dhe vlerësimit, si dhe praktikën e mjaftueshme konkrete të mësimdhënies. Edhe në rastet kur mësimdhënësit kanë qenë pjesë e sistemeve të ndryshme të arsimit, ata kanë nevojë për zhvillim profesional të vazhdueshëm për të plotësuar mangësitë eventuale ose për të zhvilluar shkathtësi të reja që lindin si nevojë e ndryshimeve në plan programe, në qasjen e menaxhimit të shkollës dhe proceseve dhe në teknologji”.

Edhe Rinor Qehaja nga Instituti EdGuard për Telegrafin tha se mirë zbatimi i Ligjit është përgjegjësi institucionale e MASHT-it që deri më tani ka munguar.

“Mirë zbatimi i Ligjit për profesione të rregulluara është përgjegjësi institucionale e MASHTI që fatkeqësisht deri më tani ka munguar, ligji përcakton përtej tjerash, kriteret për ushtrimin e profesionit të rregulluar, kritere të cilat vlerësoj mund të kontribuojnë në mësimdhënës fillestar më të përgatitur për profesion”, tha ai.

Ndërkaq, siç vlerësoi Qehaja si pikënisje MASHTI duhet të ndërtoj kapacitete dhe procedura që garantojnë një zbatim të drejt dhe profesional të ligjit.

“Mësimdhënësit fillestar kanë nevojë për përkrahje profesionale, dhe ky ligj shpresoj të nxis për një përkushtim dhe pasion më të madh për karrierën e mësimdhënësit”, tha ndër të tjera Qehaja.

Lexo po ashtu ​Kundërshtohet testimi i mësimdhënësve, SBASHK-u thotë se nuk do të lejojë një gjë të tillë

Mirëpo, kundër testimit të mësimdhënësve ditë më parë është deklaruar  kryetari i Sindikatës së Bashkuar të Arsimit, Shkencës dhe Kulturës, Rrahman Jasharaj, i cili thotë se një gjë të tillë nuk do ta lejojnë asnjëherë të bëhet. /Telegrafi/