Prodhuesi turk i dronëve Bayraktar: Së shpejti do të kemi një zgjidhje për “kamikazët” iranianë në Ukrainë

Prodhuesi turk i dronëve Baykar njoftoi se kompania së shpejti do të ketë një zgjidhje që duhet të ndihmojë Ukrainën në luftën kundër dronëve iranianë “kamikaze” me të cilët ushtria ruse kreu sulme në infrastrukturën kritike në Ukrainë.

Në një intervistë për agjencinë gjermane DPA, drejtori ekzekutiv i kompanisë, Haluk Bayraktar, tha se inxhinierët punojnë çdo ditë për të përmirësuar dronët e prodhimit turk.

“Së shpejti, dronët tanë Bayraktar TB2 dhe Akinci do të kenë raketa ajër-ajër, jo vetëm për të synuar dronët, por edhe aviacionin e tjerë. Testimi është duke u zhvilluar”, tha Bayraktar gjatë panairit të armatimit në Stamboll, raporton dailysabah.

Gjatë këtij panairi u nënshkrua një kontratë mes kompanive Baykar dhe Roketsan për integrimin e raketës së mbrojtjes kundërajrore Sungur për të luftuar mjetet ajrore pa pilot.

“Sungur është një municion i provuar, veçanërisht kundër objektivave në lëvizje si helikopterët dhe dronët. Përdorimi i municioneve si ajër-ajër nga dronët tanë do të ndryshojë situatën në terren”, tha Murat Ikinci, drejtor i Roketsan.

Kur bëhet fjalë për zgjidhjen e problemit të dronëve kamikaze iraniane, drejtori i Baykar deklaroi se kompania do të vazhdojë të mbështesë Ukrainën.

“Në çdo rast, ne duhet të jemi gati me kundërmasa. Ne mbështesim plotësisht Ukrainën në mbrojtjen e sovranitetit të saj. Dronët kamikaze janë të ngadaltë, të zhurmshëm dhe të vendosur në lartësi të ulëta, gjë që i bën ata objektiva të lehtë”, deklaroi Bayraktar. /Telegrafi/