Presidenti Thaçi dekoroi Fadil Vokrrin me Medaljen Jubilare të Dhjetëvjetorit të Pavarësisë

Presidenti i Republikës së Kosovës, Hashim Thaçi, e ka dekoruar me Medaljen Presidenciale Jubilare të Dhjetëvjetorit të Pavarësisë, pas vdekjes, ish-kryetarin e Federatës së Futbollit të Kosovës, Fadil Vokrrin.

Me motivacion kontributin e dhënë të Fadil Vokrrit për promovimin e sportit kosovar në botë dhe për anëtarësimin në UEFA dhe FIFA, presidenti Thaçi dekoratën ua ka dorëzuar bashkëshortes dhe dy djemve të Vokrrit.

Presidenti Thaçi ka thënë se vdekja e Fadil Vokrrit ishte një humbje e madhe për familjen, bashkëpunëtorët, qytetarët dhe sportin kosovar.

“Aty ku ishte Fadili, ishte fytyra e Kosovës. Të gjithë jemi të pikëlluar me vdekjen e Fadilit, por në të njëjtën kohë jemi krenarë për rolin e tij historik në promovimin e Kosovës në botë”, ka thënë presidenti Thaçi.

Lexo po ashtu Lamtumirë futbollisti më i madh shqiptar në histori, lamtumirë kryetari legjendar i FFK-së - Veprat e tua nuk do të harrohen asnjëherë Fadil Vokrri

Kreu i shtetit ka shtuar se në kohërat më të rëndësishme, Fadil Vokrri ka ndihmuar në zhvillimin e futbollit dhe në ngritjen e imazhit të Kosovës në botë.

Fadil Vokrri vdiq në moshën 57 vjeçare pas një sulmi të pësuar në zemër.

Në varrimin e tij përveç shqiptarëve nga e gjithë bota morën pjesë e zyrtarë të lartë nga FIFA dhe UEFA. /Telegrafi/