Skuadra braziliane Fluminense realizoi një nga befasitë më të mëdha të Kupës së Botës për Klube duke eliminuar Interin pa pësuar gol.
Në qendër të kësaj performance mbrojtëse historike qëndronin dy emra legjendarë: Thiago Silva, në moshën 40-vjeçare, dhe portieri Fabio, i cili në shtator mbush plot 45 vjet.
Pavarësisht moshës, Fabio vazhdon të shkëlqejë mes shtyllave dhe është në ndjekje të një rekordi madhor: ai synon të bëhet lojtari me më së shumti paraqitje zyrtare në historinë e futbollit – një rekord që aktualisht mbahet nga legjenda angleze, Peter Shilton.
Fabio, i cili e mbajti portën e paprekur në tri nga katër ndeshjet e Fluminenses në këtë turne, tashmë ka regjistruar 507 ndeshje pa pësuar gol – duke lënë prapa edhe legjendën italiane Gianluigi Buffon.
Aktualisht, ai ka grumbulluar 1,249 ndeshje me klube dhe, përkundër mungesës së paraqitjeve zyrtare me ekipin kombëtar të Brazilit, ka qenë pjesë e ekipit kampion në Copa América 2004. Ai është shumë pranë rekordit të Shiltonit me 1,387 ndeshje zyrtare (Guinness regjistron 1,390).
Nga akademia me Ronaldinhon te legjendë në Cruzeiro dhe Fluminense
Karriera e Fabios filloi në shekullin e kaluar. Ai ishte pjesë e ekipeve të të rinjve të Brazilit bashkë me emra si Ronaldinho dhe Matuzalém.
Megjithatë, nuk debutoi kurrë për ekipin kombëtar të të rriturve.
Ai u bë ikonë te Cruzeiro, ku qëndroi për më shumë se 15 vjet, dhe aktualisht është hero te Fluminense, me të cilën fitoi Copa Libertadores 2023.
Jeton me një sindromë të rrallë – fle vetëm tre orë në natë
Fabio ka habitur të gjithë edhe për shkak të stilit të tij të jetës. Ai vuan nga sindroma e gjumit të shkurtër, një gjendje shumë e rrallë që e lejon të funksionojë në maksimum me vetëm 3 orë gjumë në natë.
“Shkova në shtrat në 4 të mëngjesit, u zgjova në 7, i çova fëmijët në shkollë dhe tani jam në stërvitje. Nuk ngre pesha, nuk bëj masazhe. Por ndihem më mirë se kurrë”, shpjegoi ai.
Ai është pjesë e një grupi shumë të rrallë njerëzish, më pak se 5% në nivel global, të cilët jetojnë me një gjendje të njohur si sindroma e gjumit të shkurtër, e cila u lejon atyre të funksionojnë plotësisht dhe të shërohen me orë shumë më pak pushim sesa personi mesatar.
Përballja me Ronaldon dhe rekordet në horizont
Pavarësisht se është pranë përmbushjes së ëndrrës për të kaluar Shiltonin, një tjetër legjendë është në ndjekje: Cristiano Ronaldo, i cili gjithashtu vazhdon të luajë në nivel të lartë dhe mund ta thyejë rekordin në vitet në vijim. Portugezi ka zhvilluar 1286 ndeshje në karrierën e tij.
Por për momentin, Fábio është njeriu që po rishkruan historinë, duke treguar se mosha është thjesht një numër kur përballesh me disiplinë, përkushtim dhe besim të palëkundur. /Telegrafi/
