Policët dhe kalimtarët e rastit ngritin veturën ne New York, nxjerrin foshnjën 8-muajshe që kishte ngecur nën të  

Dy policët amerikanë dhe kalimtarët e rastit kanë shpëtuar një fëmijë 8-muajsh që kishte ngecur nën një veturë, që kishte “fluturuar” në drejtim të saj dhe të ëmës.

Policia e Yonkers në New York, ka njoftuar se shoferi i veturës që kishte “fluturuar” mbi nënën dhe fëmijën, kishte goditur edhe një shtyllë dhe veturën e parkuar, transmeton Telegrafi.

E ëma 36-vjeçe që ishte goditur nga vetura, në atë moment kishte qenë duke kaluar rrugën me foshnjën e saj.

Vetura më pas është përplasur në një lokal, duke përfunduar foshnja nën mjetin motorik, ka njoftuar policia e këtij qyteti amerikan.

Dy policët që në ato momente ishin në afërsi pasi kishin dalë në pauzë, kishin vrapuar në vendin e ngjarjes duke gjetur të ëmën në lokalin e shkatërruar.

Ata menjëherë kërkuan ndihmën e kalimtarëve të rastit, për ta ngritur veturën dhe ta nxjerrin foshnjën që kishte ngecur nën të.

Si pasojë e kësaj goditje, e ëma e foshnjës ka thyer këmbën, derisa foshnja ka pësuar lëndime në kokë, shpinë dhe këmbë.

Që të dyja janë dërguar në spitalin më të afërt, nga ku është bërë e ditur se pas ndërhyrjes gjendja e tyre shëndetësore është stabilizuar.

E ndaj shoferit që shkaktoi aksidentin është ngritur padi. Madje dëshmitarët okularë pretendojnë se ai ishte i dehur. /Telegrafi/