A po planifikon Netflix t’i futet biznesit të videolojërave?

Netflix ende nuk ka arritur rezultate të dukshme në botën e videolojërave, por ata nuk kanë hequr dorë nga ai segment i biznesit të tyre si Google dhe disa kompani të tjera.

Duket se Netflix po mbështet që tendencat e ardhshme të jenë në favor të tyre, kështu që ata nuk kanë plane të zhvillojnë lojëra për konsola tani për tani, transmeton Telegrafi.

Duke folur për The Game Business, kreu i Netflix Gaming, Alan Taskan tha se mbajtja e modelit ekzistues të zhvillimit të lojërave të konsolës do të ishte kufizuese për Netflix.

“Ne kemi filluar të shikojmë drejt një të ardhmeje ku platforma e lojërave nuk ka rëndësi. Vetëm shikoni brezat e rinj – a ëndërrojnë tetëvjeçarët apo dhjetëvjeçarët që një ditë të kenë një PlayStation 6? Nuk jam vërtet i sigurt për këtë”, tha Taskan.

“Ata duan të ndërveprojnë me çdo ekran, çfarëdo qoftë dhe kudo që të jetë, madje edhe në makinë. Nëse po flasim për konsola, duhet të jetë lojëra HD dhe të luajmë me një kontrollues. Nëse do të shikonim atë model të vjetër, mendoj se kjo do të na mbante prapa”, shtoi ai.

Strategjia e ardhshme e videolojërave të Netflix do të fokusohet në segmente të shumta që përfshijnë projekte narrative dhe transmediale, ekskluzivitete të njohura dhe krijimin e lojërave “party” për fëmijë dhe familje.

Në këtë strategji të fundit, Netflix planifikon të zbatojë qasjen e Nintendo nga epoka e konsolës së parë Wii, por me ndryshimin se do të mbështetet në telefonat celularë si kontrollues. /Telegrafi/