Planet e Messit: E ardhmja e tij në PSG, Liga e Kampionëve dhe Kupa e Botës

Shumë njerëz kanë folur për Lionel Messin dhe të ardhmen e tij, pas eliminimit të Paris Saint-Germain nga Real Madridi në Ligën e Kampionëve.

Megjithatë, në klubin francez ka pak dyshime për yllin argjentinas. Planet e ardhshme të PSG-së janë ende të përqendruara rreth sulmuesit, i cili synon të përfundojë vitin e dytë të kontratës së tij dhe nuk ka asnjë mundësi për të nënshkruar një të tretë.

PSG është e varur nga Messi për disa arsye, me largimin e mundshëm të Kylian Mbappe në Real Madrid dhe rënien sportive të Neymar që është në krye të listës.

Lexo po ashtu Vendime të mëdha në PSG: Kush qëndron dhe kush largohet?

Madje, pa Mbappen ka shumë gjasa që roli i Messit në skuadër të ndryshojë, edhe pse duhet parë sigurisht se kush është trajneri i ardhshëm.

Këtë sezon, Messi është parë më shumë si një organizator sesa një sulmues. Ai ka luajtur më thellë, duke ndërtuar lojën dhe duke i dhënë Mbappes shumë përgjegjësi në sulm. Nëse Mbappe largohet, Messi mund të kalojë në një pozicion më të avancuar në ekip.

Objektivat e Messit në të ardhmen

Ka ende një rrugë të gjatë për të bërë, por Messi , i cili është fitues, tashmë po mendon për Ligën e Kampionëve të ardhshme, një garë që PSG-së i duhet absolutisht ta fitojë. Ai është më shumë se i gatshëm për këtë sfidë, dhe kjo është arsyeja pse ai nuk ka asnjë hezitim për të qëndruar në vitin e tij të dytë.

Megjithatë, ky sezon duhet të përfundojë, dhe detyra e parë në rendin e ditës është mbyllja e Ligue 1. PSG është 15 pikë përpara Marseille dhe pothuajse të gjithë besojnë se është një përfundim i paramenduar në këtë pikë. Messi dëshiron të vazhdojë të fitojë tituj dhe Ligue 1 është një tjetër që ai dëshiron të shtojë në koleksionin e tij.

Numrat e tij individualë dhe kolektivë nuk janë mjaftueshëm të mirë këtë sezon për të fituar çmime individuale dhe Topi i Artë – që do të jepet në korrik të këtij viti – nuk është as në diskutim, ndërsa ai është shumë larg të qenit golashënuesi më i mirë i Ligue 1 me vetëm dy gola deri tani.

Natyrisht, Messi më pas e ka Kupën e Botës në nëntor dhe dhjetor në mendjen e tij gjatë gjithë kohës. Do të jetë, teorikisht, shansi i tij i fundit për të qenë kampion bote pasi ai do të jetë 35 vjeç, kështu që ai do të jetë plotësisht i fokusuar në atë kampionat.

Nuk është e vërtetë, siç pretendojnë shumë media argjentinase, se ai jeton vetëm për kombëtaren. Të jesh në top formë me PSG-në është mënyra më e mirë për të qenë në top formë për Kupën e Botës me Argjentinën. /Telegrafi/