Plagosen me armë zjarri dy persona në Prishtinë

Si pasojë e gjuajtjeve me armë të zjarrit, mbrëmjen e së martës dy persona janë plagosur brenda një dyqani në lagjen “Kodra e Trimave” në Prishtinë.

Zëdhënësi i Policisë për Rajonin e Prishtinës, Agron Borovci ka thënë për Telegrafin se për rastin në fjalë dy persona janë arrestuar.

“Rreth orës 19:45, është raportuar për gjuajtje me armë zjarri në lagjen “Kodra e Trimave” në Prishtinë. Me të marrë informatën, policia ka dalë në vendin e ngjarjes dhe nga informacionet e para është bërë e ditur se ngjarja ka ndodhur brenda një dyqani dhe për pasojë dy persona kanë marrë plagë nga arma e zjarrit”, ka deklaruar Borovci.

Ai thotë se të lënduarit janë dërguar në QKUK për trajtimin e nevojshëm mjekësor.

Poashtu policia ka vazhduar me veprime të tjera operativo-hetimore dhe atyre të ekzaminimit me ç’ rast ka gjetur dhe sekuestruar edhe një armë zjarri.

“Dy persona janë arrestuar nga policia nën rrethana që ndërlidhen me ngjarjen, ndërkaq vijon puna për identifikimin e personave të tjerë të implikuar në rast si dhe zbardhjen e plotë të rrethanave të ngjarjes”, ka deklaruar tutje Borovci./Telegrafi/