Përtërini flokët në shtëpi

Nuk është e thënë që duhet doemos të shkojmë te floktari, për të pasur flokë të mrekullueshëm.

Produktet e shumta që i përdorim në shtëpi mund t’i ngarkojnë flokët aq shumë, saqë ata të bëhen të rëndë dhe ta humbin formën.
Ja çka mund të bëni në shtëpi, pa shumë shpenzime, për të pasur flokë sa më të bukur.

Të gjithë ne ndonjëherë kemi ditë të vështira, kur flokët nuk kanë atë pamje që do të donim ta kishin. Shkak i kësaj mund të keni qenë vetë ju. Ka të ngjarë që flokët t’i keni trajtuar tepër me produkte të llojllojshme, të cilat i kanë bërë ata të papastër dhe të rëndë. Në vend që të blini produkte për pastrim, mund ta përgatitni një produkt në shtëpi dhe t’i freskoni flokët.

Ngjashëm me lëkurën, të cilën rregullisht e pastrojmë nga papastërtitë e ndryshme dhe i bëjmë piling, po ashtu edhe flokët kanë nevojë për një tretman të ngjashëm. Krahas shamposë, që do të largojë papastërtitë, nevojitet edhe një përbërës më i ashpër, ku në këtë rast kripa e kuzhinës është ideale. Në një enë të qelqtë qitni pak kripë dhe pak më pak shampo.

Përziejeni mirë këtë masë dhe me të lani flokët. Në fund flokët shpëlani me ujë të vakët. Këtë tretman mund ta bëni një herë në muaj, sepse nuk preferohet që ta teproni. /Telegrafi/