Përjashtimi i katër komunave në veri nga ngritja e çmimit të rrymës, Tahiri: Prokurori i Shtetit ta hetojë ZRrE-në

Kryetari i Grupit Parlamentar të AAK-së, Besnik Tahiri, ka fajësuar Zyrën e Rregullatori të Energjisë për diskriminim etnik, pasi ka përjashtuar katër komunat në veri nga ngritja e çmimit të energjisë elektrike, duke kërkuar nga Prokurori i Shtetit që të hetojë ZRrE-në për shpërdorim të detyrës.

Tahiri, përmes një postimi në Facebook, ka thënë se “tentimi i Qeverisë përmes kryesuesit të Bordit të ZRrE-së për të arsyetuar diskriminimin etnik që ZRrE-ja është duke ua bërë shqiptarëve të Kosovës me rastin ngritjes së çmimit të rrymës, duke përjashtuar kështu komunat veriore nga kjo ngritje e çmimeve, është një veprim i ulët, diskriminues dhe me elemente raciste”.

Tahiri ka thënë se kjo duhet të kundërshtohet fuqishëm nga të gjithë spektri politik, shoqëria civile dhe qytetarët e vendit.

“Gjithashtu, ftoj prokurorin e shtetit që pa humbur kohë të fillojnë hetimet ndaj ZRrE-së nën dyshimim e shpërdorimit të detyrës zyrtare”, ka shkruar Tahirti, transmeton Telegrafi.

Kryesuesi i Bordit të Zyrës së Rregullatorit të Energjisë (ZRRE), Ymer Fejzullahu ka thënë sot se katër komunat veriore me shumicë serbe nuk janë pasqyruar në raportin konsultativ për rritjen e tarifave të energjisë elektrike.

Lexo po ashtu ZRRE: Në katër komunat veriore me shumicë serbe nuk do ketë rritje të tarifave të rrymës

Fejzullahu gjatë raportimit në Komisionin për Ekonomi ka sqaruar se për procesin gjyqësor që është ZRRE sa i përket shpenzimit të energjisë elektrike në atë pjesë.

Po ashtu, ai ka theksuar se gjatë këtij viti ka hapur shqyrtimin e jashtëzakonshëm në bazë ligjore për caktimin e tarifave, për të reflektuar kostot e sistemeve.

Sipas Fejzullahut, Kosova ka importuar energji elektrike me çmim tetë herë më të lartë dhe se gjatë muajit dhjetor 2021 është arritur piku maksimal i konsumit ditor të rrymë.

Për çështjen e ngritjes së çmimit të energjisë elektrike, Kuvendi i Kosovës, me kërkesën e PDK-së, ka mbajtur një seancë të jashtëzakonshme të hënën, ku opozita ka kundërshtuar ngritjen e çmimit.

Ndërsa, kryeministri Albin Kurti ka thënë se do t’i dërgojnë komentet lidhur me raportin e fundit konsultativ të ZRRE-së.

“Ne do t’i dërgojmë komentet tona. ZRRE është institucion i pavarur. Ta zëmë se unë nuk e kam numrin e kryesuesit të Bordit, mirëpo ministrat e linjës dhe nga Kuvendi i Kosovës do t’i dërgojnë sa më parë komentet në mënyrë që Bordi i ZRRE-së, bazuar në raportin e vet t’i trajtoj sugjerimet”, ka theksuar Kurti. /Telegrafi/