Pendarovski: Padrejtësitë historike ndaj romëve janë ende të gjalla

“Duke kujtuar dhe nderuar miliona viktima të Luftës së Dytë Botërore, nuk duhet të harrojmë më shumë se 4300 fëmijë, gra dhe burra romë që u ekzekutuan në kampin nazist në Aushvic-Birkenau”, ishte mesazhi i presidentit të vendit Stevo Pendarovski me rastin e 2 gushtit – Ditës Evropiane të Përkujtimit të Holokaustit të Romëve.

“Në atë periudhë të tmerrshme të historisë, ishin në fuqi ligje që zhvlerësonin jetën njerëzore dhe dinjitetin e natyrshëm të grupeve të ndryshme, përfshirë romët. Ideologjia e kohës lejonte shfrytëzimin e punës së tyre, eksperimente çnjerëzore mjekësore, sterilizime të detyruara dhe në fund, vrasje masive në kampet e vdekjes. Gjatë Luftës së Dytë Botërore, mbi 500,000 romë u vranë në të gjithë Evropën dhe Ballkanin”.

“Është shqetësuese fakti që padrejtësitë historike ndaj romëve janë ende të gjalla – mohimi i gjenocidit ndaj tyre, racizmi, anti-ciganizmi, gjuha e urrejtjes dhe diskriminimi, intensiteti i të cilave po rritet edhe në shoqëritë moderne demokratike. E gjithë kjo i shtyn romët në margjina dhe e shtyn luftën për të drejtat dhe liritë e tyre njerëzore”, tha Pendarovski.

Sipas tij romët janë pjesë e pandashme e mozaikut social maqedonas që ndan aspiratat dhe sakrificat në luftën për një shoqëri të lirë. Ajo bashkëjetesë duhet të vazhdojë në frymën e solidaritetit, humanizmit dhe respektit të ndërsjellë.