PD proteston kundër mbylljes së TikTok, Berisha u bashkohet protestuesve

Partia Demokratike ka organizuar një protestë ditën e sotme kundër vendimit të qeverisë që ka mbyllur rrjetin social TikTok në Shqipëri.

PD e cilëson këtë si akt censure të fjalës së lirë, një veprim që vjen në prag të fushatës elektorale të zgjedhjeve parlamentare të 11 Majit.

Për mbarëvajtjen e rendit dhe sigurisë, policia ka angazhuar në terren 1 mijë efektivë.

Disa rrugë në kryeqytet janë bllokuar për shkak të tubimit elektoral të PD.

Nuk do të lejohet parkimi i automjeteve në bulevardin ”Dëshmorët e Kombit”, në sheshin “Nënë Tereza, në rrugën “Ismail Qemali”, nga kryqëzimi i Rrugës së Elbasanit me rrugën “Ibrahim Rrugova”, në rrugën “Papa Gjon Pali II”, në bulevardin ”Zhan D’Ark” dhe bulevardin ”Bajram Curri”, nga kryqëzimi i Rrugës së Elbasanit me rrugën “Ibrahim Rugova”;

Në bulevardin “Dëshmorët e Kombit” është bllokuar qarkullimi i automjeteve, nga kryqëzimi afër Ministrisë së Brendshme deri te sheshi “Nënë Tereza”, si dhe në rrugët “Ukraina e Lirë”, “Papa Gjon Pali II” dhe “Ismail Qemali”.

Protesta e Partisë Demokratike do të kulmojë në bulevardin “Dëshmorët e Kombit” përpara godinës së Kryeministrisë./TV Klan