Shërbimet polake të sigurisë kanë ndaluar një student të dyshuar për përgatitjen e sulmit, tha të martën Jacek Dobrzynski, një zëdhënës i shërbimeve speciale të Polonisë.
Mateusz W, një student në Universitetin Katolik të Lublinit, donte të kryente një sulm duke përdorur eksplozivë dhe planifikonte të bashkohej me një organizatë terroriste, tha ai, transmeton Telegrafi.
"Qëllimi i krimit ishte të frikësonte shumë njerëz dhe të mbështeste Shtetin Islamik. Gjatë hetimit, oficerët e Agjencisë së Sigurisë së Brendshme sekuestruan bartës të të dhënave dhe sende që lidhen me Islamin", shkroi Dobrzynski në platformën X.
Zyra e prokurorit akuzoi Mateusz W për "ndërmarrjen e veprimeve përgatitore për të kryer një sulm terrorist, që mund të kishte rezultuar në vdekjen ose plagosjen serioze të shumë njerëzve".
"Për më tepër, ai ndërmori hapa për të vendosur kontakt me një organizatë terroriste, duke përfshirë marrjen e mbështetjes së saj në kryerjen e sulmit", thuhet në deklaratë.
“Burri ishte shumë i magjepsur nga Islami, kërkoi të krijonte kontakte me Shtetin Islamik dhe po përgatiste një sulm në Poloni, në një nga qytetet gjatë tregut të Krishtlindjeve”, tha Dobrzynski gjatë një konference për shtyp.
I dyshuari, tha ai, u arrestua në apartamentin e tij në Lublin, Polonia lindore, në nëntor.
Dobrzynski shtoi se oficerët e Agjencisë së Sigurisë së Brendshme konfiskuan bartës të dhënash dhe sende që lidhen me Islamin.
Zyrtari nuk pranoi të komentonte se në cilin qytet po planifikohej sulmi në mënyrë që “të mos shkaktonin panik”.
Autoritetet nuk dhanë menjëherë detaje të mëtejshme rreth të dyshuarit, i cili u vu në paraburgim për një periudhë paraprake prej tre muajsh. /Telegrafi/
