Paraburgim për të dyshuarin që sulmoi seksualisht 6-vjeçaren në Prishtinë

Gjykata Themelore në Prishtinë ia ka caktuar masën e paraburgimit prej një muaji të pandehurit me inicialet B.H., pasi dyshohet se ka sulmuar seksualisht një 6-vjeçare.

“Gjyqtari i procedurës paraprake kërkesën e Prokurorisë së Shtetit për caktimin e masës së paraburgimit kundër të pandehurit B.H, e ka aprovuar si të bazuar dhe të njëjtit i ka caktuar masën e paraburgimit në kohëzgjatje prej 1 (një) muaji, të pandehurit B.H masa e paraburgimit i caktohet në bazë të nenit 187 paragrafi 1 nënparagrafi 1 dhe 2 pika dhe 1.2.2 dhe 1.2.3 të KPPRK-së”, thuhet në komunikatën për media.

Lexo po ashtu Video nga rasti i ngacmimit seksual ndaj 6-vjeçares - Prokuroria paraqet kërkesë për paraburgim për të dyshuarin

“Gjykata me rastin e caktimit të paraburgimit ka marrë parasysh peshën e rëndë të veprës penale, mënyra dhe rrethanat në të cilat është kryer vepra penale ku dyshohet se është kryer ndaj viktimës së ndjeshme – e mitur dhe me lënien në liri të të pandehurit ekziston rreziku i ikjes, me qëllim të shmangies nga përgjegjësia penale, ndikimit në dëshmitarë andaj masa e paraburgimit tani për tani është e vetmja masë preventive që do të parandaloj të pandehurin në përsëritjen e veprës penale të njëjtë apo të ngjashme”.

Kundër këtij aktvendimi, palët e pakënaqura kanë të drejtë ankese në Gjykatën e Apelit. /Telegrafi/