Paqe kuqezi, barazojnë Vëllaznimi dhe Drenica  

Vëllaznimi nga Gjakova nuk ka mundur të fitojë ndaj Drenicës, pasi pas 90 minutave ndeshje përfundoj me rezultat të barabartë 1-1 në ndeshjen e vlefshme për javën e 13-të të Superligës së Kosovës.

Skuadra e drejtuar nga Ismet Munishi ishte afër ta merrte fitoren e dytë në katër takimet e fundit, por në fund pranuan gol duke iu mohuar fitorja.

Pjesa e parë nisi më mirë për mysafirët nga Skenderaj, të cilët në minutën e nëntë goditën shtyllën me anë të mesfushorit Hysen Tahimit.

Pas këtij rasti të mysafirëve, Vëllaznimi u kthye në lojë duke rrezikuar me Kushtrim Gashin (22’), Lorik Rudin (31’), por në dy rastet nuk pati gol.

Megjithatë, goli për vendasit nuk vonoi dhe në minutën e 43-të ishte sulmuesi Semir Zeneli, i cili shënoi gol të lehtë nga afërsia dhe dërgoi skuadrën e tij në pushim me një gol epërsi.

Në pjesën e dytë, vendasit arritën të menaxhojnë mirë lojën, duke shënuar edhe një gol në minutën e 70-të me anë të Paolo Ivanit, por gjyqtari anuloi këtë gol.

Krejt në fund kur pritej një fitore e vendasve, në skenë u shfaq mbrojtësi Visar Berisha, i cili barazoi rezultatin 1-1 në minutën e 90-të dhe vulosi rezultatin përfundimtar .

Pas këtij barazimi, Vëllaznimi e sheh veten në pozitën e shtatë me 18 pikë, ndërsa Drenica renditet e nëntë me 15 pikë.

Në ndeshjen e ardhshme, gjakovarët udhëtojnë drejt Vllaznisë së Pozheranit, ndërsa Drenica e pret në shtëpi Trepçën ’89. /Telegrafi/