Pahor për dialogun Kosovë-Serbi: Çështjet mes popujve e shteteve duhet të zgjidhen me sinqeritet më të madh se deri më sot

Presidentja e Kosovës, Vjosa Osmani ka pritur sot presidentin e Sllovenisë, Borut Pahor i cili erdhi për vizitë në Kosovë.

Pas takimit që patën, Pahor tha në konferencën për medie se çështjet mes popujve edhe shteteve duht të zgjidhen me sinqeritet më të madh politik se deri më sot.

“Evropa pret që proceset e reformave të bëhen më shpejt. Çështjet mes popujve dhe shteteve të zgjidhen me sinqeritet më të madh politik se deri sot. Për dialogun duhet të shprehet gatishmëri. Besoj se pushteti në Kosovë të jetë i gatshëm që me tërë fuqinë dhe autoritetin e vet t’i jap këtij dialogu një nxitje të re”, ka thënë ai.

Ai u shpreh se në pjesën e dytë të këtij viti, Sllovenia do ta udhëheq BE-në dhe se takimi i së hënës është test për lëvizje pozitive për udhëheqësit në Ballkan.

“Do të dëshiroja që të shoh një lëvizje pozitive në këtë drejtim. Testi i parë i udhëheqëve të këtyre shteteve është takimi i së hënës. Do të provojmë a jemi të aftë te konstatimet dhe qëndrimet e përbashkëta lidhur me përspektivën evropiane të Ballkanit. Besoj se do të kemi fat dhe ta bëjmë një gjë të tillë. Të hënën do të bëj biseda telefonike, me gjithë dëshirën që ky takim të jetë një bashkim i fuqishëm për BE-në dhe shtetet e Ballkanit Perëndimor”, tha ai.

Në pyetjen e gazetarëve për “non-papers” dhe qëndrimin e tij, ai u shpreh se nuk pajtohet me ndryshimin e kufijve.

“Për punën e ndryshiit të kufijve nuk pajtohem. Qëndrimi im në lidhje me këtë është plotësisht i kundërt. Dëshiroj t’i bind bashkëbiseduesit që të fillohet me procesin e zgjerimit dhe reformave, kjo është një domosdoshmëri historike”, ka thënë ndër tjerash Pahor. /Telegrafi/