Organizatat ndërkombëtare i shkruajnë Kurtit, shprehen të shqetësuara me emërimin e Gërvallës në RTK

Instituti Ndërkombëtar i Shtypit i është bashkuar katër organizatave ndërkombëtare për lirinë e mediave, të cilat përmes një letre i janë drejtuar kryeministrit të Kosovës, Albin Kurti, lidhur me procesin e emërimit të drejtorit në Radiotelevizionin e Kosovës.

Ato kanë shprehur shqetësim për emërimin e drejtorit të ri të televizionit, Rilind Gërvallës, pasi sipas tyre, kjo e minon procesin e fundit të reformave.

Organizatat kanë përmendur standardet e Këshillit të Evropës për këtë proces, sipas së cilave emërimet nuk mund të përdoren për të ushtruar ndikim politik ose ndikim tjetër mbi funksionimin e medias së shërbimit publik, si dhe individët e emëruar në pozitat drejtuese brenda transmetuesve të shërbimit publik duhet të jenë plotësisht të pavarur nga të gjitha partitë politike dhe interesat e veta.

“Megjithatë, vërejmë se lajmet e shumta të publikuara nga mediat në Kosovë kanë treguar lidhje të qarta mes z. Gërvalla dhe partisë suaj politike Vetëvendosje. Organizatat tona besojnë se këto lidhje vënë në pikëpyetje integritetin e procesit dhe rrezikojnë të minojnë më tej besimin e publikut në autonominë politike të transmetuesit”, thuhet në letër.

Tutje, Instituti ka thënë se ka monitoruar zhvillimet në transmetuesin publik që nga ardhja e Vetëvendosjes në pushtet, dhe se ka vërejtur “përparimin e lavdërueshëm të bërë gjatë administratës suaj në mbikëqyrjen e depolitizimit të RTK-së dhe strukturave të saj menaxhuese pas dekadave të kontrollit shtetëror, përfshirë këtu edhe vendimet e fundit menaxheriale të marra nga Bordi”.

Ky progres thuhet se është pranuar edhe ndërkombëtarisht në raportet e BE-së dhe organeve ndërkombëtare të të drejtave të njeriut.

“Është jetike që ky përparim i arritur me vështirësi, i udhëhequr nga partia juaj, të mos minohet. Besojmë se për sa kohë që Gërvalla shërben si drejtor i televizionit, nuk do t’iu lejojë ju dhe partisë suaj që të vazhdoni depolitizimin dhe reformën në transmetuesin publik”, thuhet në letrën drejtuar Kurtit.

Ndërkaq, instituti ka sugjeruar që të organizohet proces i ri rekrutimi dhe emërimi për të siguruar që pozicioni të plotësohet nga një kandidat profesionist, pa lidhje me qeverinë apo ndonjë parti politike.

Po ashtu, instituti bashkë me organizatat e tjera kanë shprehur shqetësimin edhe për shkurtimin vjetor të financimit të vendosur për RTK-në nga qeveria.

Organizatat e përfshira në letër: Article 19 Europe, Qendra Evropiane për Lirinë e Shtypit dhe Medias, Federata Evropiane e Gazetarëve dhe Reporterët Pa Kufij./Telegrafi/