Ohër, pronarët e objekteve vetë i çmontojnë tarracat

Disa nga hotelierët e Ohrit sot kanë filluar të heqin platformat e paligjshme pranë liqenit me iniciativën e tyre. Të tjerët i hiqnin tarracat e verës që ndodheshin përskaj bregut të qytetit. Të gjithë kanë afat deri në 26 shtator, që ta bëjnë vetë, nëse jo, komuna do të duhet t’i rrënojë vetë, megjithëse për këtë qëllim ka vetëm 25,000 euro për këtë vit. Prandaj, faturat do t’ua dorëzojnë pronarëve të objekteve që do të rrënohen.

“Pas prishjes së secilit objekt individualisht, kompania e përzgjedhur për heqjen e ndërtesave pa leje do t’i paraqesë një listë të shpenzimeve komunës për punën e bërë. Pastaj, komuna me procesverbal, koston e prishjes do tua faturojë pronarëve – njoftojnë nga Komuna e Ohrit.

Kryetari i shoqatës së hotelierëve të Ohrit, Mihail Mishev, për Alsat tha se heqja e platformave dhe tarracave nuk do të ndikonte vetëm në punën e tyre, por edhe në turizmin në qytet.

“Ne mendojmë se vendimi për rrënim, është i nxituar dhe jo shumë i shqyrtuar. As pasojat e mundshme të kësaj situate nuk u morën në konsideratë – thonë nga Shoqata e hotelierëve të Ohrit.

Përndryshe, këshilltari dhe kryetari i BDI-së në Ohër, Nefi Useini, e anuloi një protestë që e kishte planifikuar nesër përpara komunës. Ai planifikonte të protestonte pikërisht kundër aksionit për prishjen e objekteve të paligjshme. Ai përmes telefonit, për Alsat tha se protesta ishte anuluar për shkak se është arritur një marrëveshje. Por nuk dëshironte të specifikonte me kë ishte arritur dhe çfarë marrëveshje ishte ajo./alsat/