Nuk ka ilaç për sëmundjen e Crohn-it, por ja çfarë mund të ndihmojë

Dhimbja dhe diarreja zvogëlohen dhe si mund të shmangni pasoja të rënda

Pasoja e sëmundjes së Crohn-it mund të jetë anemia, inflamacioni i mëlçisë dhe i kanaleve biliare dhe ja cilat janë simptomat e mundshme…

Sëmundja e Crohn-it është një lloj inflamacioni i zorrëve që shkakton ënjtje të indeve në traktin tretës. Kjo çon në dhimbje stomaku, diarre të forta, lodhje, si dhe humbje peshe.

Inflamacioni i shkaktuar nga sëmundja e Crohn-it mund të prekë pjesë të ndryshme të sistemit të tretjes në njerëz të ndryshëm. Megjithatë, më shpesh, zorra e hollë është në rrezik.

Përveç simptomave të mësipërme, mund të shfaqen gjak në jashtëqitje, dhimbje në rajonin e anusit, por edhe temperaturë e ngritur, si dhe afta në zgavrën e gojës, shkruan Mayo Clinic, përcjell Telegrafi.

Pasoja e sëmundjes së Crohn mund të jetë anemia, d.m.th mungesa e hekurit, inflamacioni i mëlçisë ose i kanaleve biliare, gurët në veshka dhe ndryshimet në lëkurë dhe kyçe.

Lexo po ashtu Gjakrrjedhje zorrësh, dhimbje të tmerrshme dhe trishtim i thellë: Një sëmundje për të cilën të gjithë heshtin

Ende nuk është plotësisht e qartë se çfarë e shkakton sëmundjen e Crohn-it. Në një kohë dyshohej se mund të ishte stresi apo mënyra e të ushqyerit, por tani mjekët bien dakord se këta faktorë vetëm sa mund ta përkeqësojnë sëmundjen.

Sot dihet se mund të shfaqet në disa raste në të njëjtën familje, zakonisht para moshës tridhjetë vjeçare. Pirja e duhanit rrit rrezikun, ashtu si edhe përdorimi i barnave anti-inflamatore jo-steroide.

Sëmundja e Crohn zbulohet përmes një kombinimi të analizave të simptomave dhe testeve laboratorike, dhe ndonjëherë mund të nevojitet një kolonoskopi, endoskopi ose imazhe me rezonancë magnetike.

Nuk ka kurë specifike për këtë sëmundje dhe mjekët përshkruajnë medikamente që mund të lehtësojnë simptomat. Me terapinë e duhur dhe barnat e kombinuara mirë, shumica e pacientëve mund të vazhdojnë një jetë normale. /Telegrafi/