Nuk ka coronavirus në Kosovë, rezultatet e pacientëve të dyshuar dalin negative

Instituti Kombëtar i Shëndetësisë Publike i Kosovës (IKSHPK), ka njoftuar se në Kosovë ende nuk ka asnjë rast me coronavirus.

Në njoftimin e bërë për media thuhet se analizat e tre pacientëve të dyshuar kanë rezultuar negative, transmeton Telegrafi.

“Pacientët u kontrolluan nga ekipi i infektologëve në Klinikën Infektive në QKUK dhe iu morën mostrat për testim laboratorik në virusin SARS-CoV-2 dhe Influenza A dhe B. Ekipi i Laboratorit të Mikrobiologjisë Molekulare në IKSHPK ka bërë testimin në virusin SARS CoV-2 dhe në influencë A dhe B me metodën rRT-PCR të tre pacientëve.Testet kanë rezultuar negative për SARS-CoV-2, domethënë të tre pacientët nuk janë të infektuar me virusin SARS-CoV-2, ndërsa dy prej tyre është Influencë B pozitiv”, thuhet në njoftim.

IKSHPK bën të ditur se janë duke pritur rezultatet edhe të katër pacientëve.

“Sot pasdite kanë ardhur edhe katër mostra, një nga klinika pediatrike dhe tri nga Klinika Infektive të cilat në Laboratoret e IKSHPK kanë hy menjëherë në punë dhe do t’ju informojmë me kohë posa të përfundojë puna në laborator”, thuhet në njoftimin e IKSHPK-së. /Telegrafi/