“Nuk e prisja këtë në Anfield”, Guardiola shprehet i befasuar me sjelljen e tifozëve të Liverpoolit

Manchester City tashmë është pa fitore në shtatë ndeshjet e fundit në të gjitha garat pas humbjes 2-0 ndaj Liverpoolit këtë të diel.

Tifozët vendas gjatë zhvillimit të këtij takimi shfrytëzuan rastin për të bërë shaka me Pep Guardiolën, duke sugjeruar se ai do të shkarkohej në mëngjes.

Guardiola iu përgjigj atyre duke ngritur gjashtë gishta që simbolizojnë gjashtë titujt e Ligës Premier me Man Cityn, ani pse pranoi se nuk priste të dëgjonte një këngë të tillë në ‘Anfield.

“Të gjithë stadiumet duan që unë të shkarkohem, filloi tek Brightoni. Ndoshta ata kanë të drejtë me rezultatet të cilat i kemi pasur”.

“Nuk e prisja këtë në Anfield. Ata nuk e bënë kur ishte 1-0, por kur ishte 2-0. Ndoshta ata do të duhej ta këndonin në të kaluarën”, ka thënë Guardiola.

“Nuk e prisja nga njerëzit prej Liverpoolit, por është në rregull, është pjesë e lojës dhe unë e kuptoj plotësisht”.

“Ne kemi pasur disa beteja të jashtëzakonshme së bashku, unë kam respekt për ata”.

“Unë po ulem këtu si trajner dhe po mbrojë atë që kemi bërë në të kaluarën falë tyre (lojtarëve të Man Cityt) dhe më shumë se kurrë dua të jem me ta dhe t’i përqafojë ata”, përfundoi tekniku spanjoll./Telegrafi/