Nketiah nderon Arsenalin, Topçinjtë mposhtin me rezultat të thellë Sheffieldin

Arsenal ka shënuar fitore ndaj Sheffield United, ndeshje kjo e cila ishte e vlefshme për javën e dhjetë në elitën e futbollit anglez.

Vendasit morën epërsinë në minutën e 28-të përmes Eddie Nketiah i cili bëri një finalizim të bukur të aksionit për të shënuar për 1-0 në cepin e majtë të portës kundërshtare.

Në vazhdim nuk pati më raste të mira shënimi dhe pjesa e parë u mbyll me epërsinë minimale të Arsenalit.

Të besuarit e Artetas e dyfishuan epërsinë në minutën e 50-të ku edhe kësaj radhe protagonist kryesor ishte përsëri Nketiah, i cili shfrytëzoi një top të humbur nga mysafirët brenda zonës dhe me një goditje të fuqishme shënoi për 2-0.

Arsenali nuk u ndal më kaq dhe shënoi edhe një herë tjetër për 3-0, përmes Nketiah i cili kompletoi het-trikun e tij personal në këtë sfidë pas një tjetër super goli të shënuar.

Pas tij Fabio Vieira dhe Takehiro Tomiyasu shënuan nga një gol për rezultatin përfundimtar 5-0.

Me këtë fitore Arsenali ngjitet në pozitën e dytë në tabelë me 24 pikë, dy më pak se lideri Tottenham që ka 26 sosh.

Ndeshjen e radhës në kampionat, Arsenali do të ketë punë mjaft të vështirë me Newcastle në udhëtim, sfidë kjo që do të luhet vikendin e ardhshëm./Telegrafi/