Nis edicioni i 6-të i Festivalit Multikulturor, Elshani: Përmes aktiviteteve të komuniteteve po pasurohet edhe kultura e shtetit të Kosovës

Nën sloganin “Të festojmë ngjashmëritë tona”, filloi edicioni i gjashtë i Festivalit Multikulturor në Prishtinë.

Ky edicion do të fokusohet në artin dhe kulturën e komuniteteve Rom, Ashkali dhe Egjiptian në Kosovë.

Vesa Batalli, Zëvendës Drejtoreshë Ekzekutive dhe Menaxhere e Programit në Zërin e Romëve, Ashkalive dhe Egjiptianëve tha se Festivali Multikulturor  është një ngjarje që shkon përtej argëtimit dhe festës, pasi që shërben për të kujtuar vlerën e bashkimit nëpërmjet.

“Rëndësia e këtij festivali shkon përtej argëtimit dhe festimit. Ky festival është një mundësi për të ndërtuar ura të reja mirëkuptimi dhe respekti, për të pranuar dhe vlerësuar diversitetin që na bënë më të pasur si shoqëri. Përkrahja e madhe që ky festival ka marrë nga njerëzit tregon dëshirën dhe angazhimin tonë për të ndërtuar një shoqëri më të drejtë dhe të barabartë, ku çdo komunitet ndjehet i përfaqësuar dhe i vlerësuar”, tha ajo.

Sylejman Elshani, Zëvendësministër i Kulturës, Rinisë dhe Sportit tha se ky festival do të shërbejë për të promovuar kulturën e komuniteteve jo shumicë në vend.

“Ky festival është bërë një festival tradicional nga organizata Zëri Romve, Ashkalive dhe Egjiptianve në Kosovë, përmes këtij festivali po promovohet trashëgimia kulturore e këtyre komuniteteve sepse këto komunitete dinë të promovojnë astete me vlerë kulturore si në Kosovë po edhe në gjithë botën”, tha ai.

Ndër tjera ai shtoi se përmes aktiviteteve të komuniteteve po pasurohet edhe kultura e shtetit të Kosovës.

“Komuniteti Rom, Ashkali dhe Egjiptian përmes artit, ekspozitës, teatrit këngëve, librave, poezive, veshjeve tradicionale, ushqimeve të ndryshme e pasurojnë kulturën e shtetit të Kosovës”, tha ai.

Në kuadër të festivalit u prezantua edhe shfaqja “Emri im është Delthan” nga Edis Galushi. Ai për Telegrafin tha se në shumë libra të cila ai i ka hasur e ka gjetur vetën të përshkruar në një mënyrë që s’përkon me realitetin.

“Gjatë periudhës së studimeve jam ekspozua ndaj librave të ndryshme dhe duke i lexua gjithë këto vepra që në fakt janë vepra të mëdha letrare, gjithmonë e kam gjetë vetën të përshkruar në mënyrën qysh unë nuk jam rritë edhe të përshkruar në kundërshtim më të gjitha vlerat qysh më kanë folë prindërit e mi. Prindërit e mi kurrë nuk më kanë thënë që ne jemi të pavlerë, ne jemi të padijshëm, jemi përtac apo shikojmë me shtrembë ndonjë tregim. Prindërit gjithmonë më kanë tregu se sa e bukur, sa e pastër, sa e mirë është gjuha, sa e pasur është kultura. Gjithë këto vlera duke i ditur i kam transferuar në shfaqje”, tha ai.

Sa i përket shfaqjes “Emri im është Delthan”, ai tha se përmes shfaqjes shpaloset një tregim që në asnjë libër nuk mund ta gjejmë.

“Kam dashur ta përcjellë mesazhin e drejtë për drejtë te publikun shqipfolës që me e kuptua tregimin me të cilin ne rritemi edhe në fakt me e shpalosë një tregim të cilin në asnjë libër nuk munden me e gjetë”, përfundon ai. /Telegrafi/