Kur duhet të vizitoni mjekun?
Ngjirja e zërit është një nga simptomat më të zakonshme të problemeve që ndodhin në nivelin e fytit. Megjithëse zakonisht kalon vetvetiu, ajo mund të jetë edhe shenja e parë e një sëmundjeje më serioze, përfshirë edhe ato malinje.
Problemet me zërin mund të shkaktohen nga ndryshime të ndryshme në laring: që nga ënjtje të padëmshme, ciste dhe polipe, deri te tumoret. Prandaj është e domosdoshme që çdo ngjirje e zërit që zgjat më shumë se dy deri në tre javë të merret seriozisht dhe të jetë shkak për të konsultuar një otorinolaringolog apo foniatër.
Pse ndodh ngjirja e zërit?
Kjo gjendje mund të shkaktohet nga përdorimi i tepruar ose i gabuar i zërit, pirja e duhanit, kushtet e pafavorshme të ajrit, infeksionet, alergjitë, refluksi gastroezofageal (GERD) dhe madje edhe nga problemet neurologjike të lidhura me stresin. Të gjitha këto janë arsye për të mos e injoruar këtë simptomë, veçanërisht nëse ajo vazhdon për një kohë të gjatë.
Pirja e duhanit është shkaku më i zakonshëm i kancerit të laringut, dhe shpesh, ndryshimet në zë janë shenja e parë paralajmëruese. Edhe sëmundja e refluksit mund të ndikojë ndjeshëm në zë dhe të sjellë komplikime të rënda, ndaj kërkon diagnostikim në kohë, transmeton Telegrafi.
Diagnostikimi - Si përcaktohet shkaku i ngjirjes?
Diagnostikimi përfshin kontrollin e veshëve, hundës dhe fytit, si dhe një ekzaminim endoskopik të laringut për të vlerësuar lëvizjen dhe gjendjen e kordave vokale. Trajtimi pastaj përcaktohet sipas shkakut: nga ushtrimet për zë dhe frymëmarrje, trajtimi i infeksioneve dhe alergjive, deri te ndërhyrjet kirurgjikale në raste të veçanta.
Ngjirja e zërit nuk është vetëm një shqetësim i përkohshëm, mund të jetë simptomë e një gjendjeje serioze. Diagnoza e hershme është çelës për një trajtim të suksesshëm. Nëse simptomat zgjasin më shumë se dy javë, mos prisni – konsultohuni me mjekun. Një kontroll në kohë mund të shpëtojë jo vetëm zërin, por edhe jetën.
A mund të zgjidhet ngjirja e zërit në mënyrë natyrale?
Ngjirja e zërit nuk është sëmundje në vetvete, por mund të ndikojë si në mirëqenien fizike ashtu edhe në atë emocionale. Prek këdo: fëmijë, të rritur, folës profesionistë, këngëtarë apo edhe dikë që ka vetëm një ftohje të zakonshme.
Ajo shoqërohet shpesh me tharje, ndjesi kruarje ose dhimbje në fyt. Edhe pse zakonisht kalon vetë, nëse zgjat më shumë se 10-15 ditë, duhet të trajtohet me kujdes.
Mjetet natyrale mund të ofrojnë lehtësim, por vetëm nëse nuk ka sëmundje të fshehura. Përndryshe, ato mund të maskojnë një gjendje serioze.
Mënyra natyrale për lehtësimin e ngjirjes së zërit
1. Çaj sherebele - për qetësim dhe dezinfektim të fytit. Sherebela ka veti anti-inflamatore, antiseptike dhe qetësuese. Përdoreni si çaj 2-3 herë në ditë, para vakteve.
2. Xhenxhefili - kundër inflamacionit. Lufton acarimin dhe ndihmon në kollë. Ziejeni për 20 minuta dhe konsumojeni të ngrohtë.
3. Kamomili - ndihmë e butë dhe natyrale. Veçanërisht i dobishëm nëse ngjirja është shkaktuar nga viruset. Pini deri në 4 gota në ditë.
Këshilla shtesë për kujdesin ndaj zërit:
• Pushoni zërin - mos flisni më shumë se duhet dhe kurrë mos pëshpëritni
• Hidratohuni - uji i ngrohtë, çajrat dhe supat janë të dobishme
• Shmangni kafeinën dhe alkoolin, ato thajnë mukozën
• Përdorni lagështues, sidomos në ambiente me ajër të thatë
• Ndaloni pirjen e duhanit - tymi dëmton rëndë kordat vokale
• Çamçakëzi ose tabletat e fytit stimulojnë prodhimin e pështymës
• Kujdes nga alergjenët - pluhuri, tymi dhe poleni mund ta përkeqësojnë gjendjen
Nëse ngjirja e zërit nuk largohet pas dy javësh, mos u mjaftoni me trajtime natyrale, kërkoni ndihmë profesionale. Kujdesi në kohë është vendimtar. /Telegrafi/
