Neymar thotë se Messi tani ndihet si në shtëpi, tregon edhe arsyen pse nuk shikon kurrë futboll

Lionel Messi është duke kaluar në një formë fantastike, më e mira që nga transferimi i tij te PSG.

Sulmuesi argjentinas po shkëlqen me gola e asistime, ndërsa në formë të lartë janë edhe dyshja Kylian Mbappe e Neymar Jr.

Sulmuesi brazilian, Neymar ka folur për momentin e mirë të Messit, duke thënë se shoku i tij i skuadrës tanimë është duke u ndjerë si në shtëpi.

Neymar e kupton që për Messin ka qenë i vështirë largimi nga Barcelona pasi ai kishte një kohë të gjatë në klubin katalunas.

“E njoh shumë mirë Leon, ndryshimi që bëri vjet ishte i vështirë. Ai jetonte prej një kohe të gjatë në Barcelonë me familjen e tij. E vërteta është se një ndryshim i tillë nuk është aspak i lehtë”.

“Por, unë mendoj se tani ai është më mirë dhe ndihet gjithnjë e më shumë si në shtëpinë e tij. Dua që të argëtohet sa më shumë të jetë e mundur”, deklaroi Neymar.

Tutje sulmuesi brazilian zbuloi edhe arsyen pse nuk shikon asnjëherë futboll gjatë kohës së lirë që ka.

“Nuk kam qenë kurrë një person që fillon të shikojë ndeshje futbolli në kohën e lirë. Gjithmonë kam luajtur futboll dhe jam marrë me gjëra të tjera. Kjo është e vërteta”.

“Nuk më pëlqen as kur miqtë e mi duan të shohin një ndeshje futbolli, atë e bëjnë gjithmonë një gjë të tillë, por unë u them: ‘Jo, le të bëjmë ndonjë gjë tjetër tani. Më mirë shohim ndonjë film'”, tha sulmuesi brazilian. /Telegrafi/