Ndërron jetë komandanti i parë i njësisë elitare amerikane “Navy Seal Team Six”, që vrau Osama Bin Ladenin

Richard Marcinko, komandanti i parë i njësisë “Navy SEAL Team Six”, që kishte neutralizuar liderin e organizatës terroriste Al Qaeda – Osama Bin Laden në vitin 2011, ka ndërruar jetë në natën e festës së Krishtlindjes në moshën 81-vjeçare, ka njoftuar familja e tij.

E bija e tij Katty Richie, ka konfirmuar se komandanti dhe veterani i luftës së Vietnamit ka ndërruar jetë si pasojë e sulmit në zemër, transmeton Telegrafi.

Nancy Marcinko, gruaja e tashmë të ndjerit, ka njoftuar se Marcinko ka ndërruar jetë i qetë në shtëpinë e tij.

“Ka qenë luftëtar për tërë botën, e për ne gjithmonë një baba, bashkëshort dhe gjysh shumë i dashur. Mbi 30 vite të jetës ia kushtoi vendit duke i shërbyer. Kur u pensionua vazhdoi të trajnoj dhe të inkurajoj ushtarët e rinj në veçanti me librat e tij”, tha gruaja e tij.

Ajo në një kumtesë shtoi se pakkush e di për natyrën e tij të qetë.

“Tani kur nuk është më, kujtimi për të nuk do të shuhet kurrë. Si familje e dimë se nuk është humbje e madhe vetëm për ne, por për të gjithë. Faleminderit për fjalët e ëmbla dhe ngushëllimet”, thuhet ndër tjera në kumtesë.

Richard u bë marins në vitin 1958, e në fund të karrierës arriti gradën e komandantit. Përveç njësisë “Team Six”, ai mori pjesë në themelimin e njësisë kundër terrorizmit “Red Cell”.

Ai ishte marrë pjesë dy herë në luftë në Vietnam, e shërbeu edhe në Kamboxhia dhe Iran. Ishte anëtar i grupit operativ gjatë krizës iraniane të pengmarrjes në vitin 1979, kur demonstruesit u futën në ambasadën amerikane në Teheran dhe morën peng shtetasit amerikanë.

Më pas u bë komandanti i parë i njësisë “Team Six”, e ky emër u përzgjodh për të bindur kombet tjera në veçanti Bashkimin Sovjetik që kanë shumë njësi për të cilat nuk e dinin se ekzistonin.

Me këtë njësi komandoi nga viti 1980 e deri më 1983. Gjatë karrierës shkroi disa libra përfshirë atë autobiografik. /Telegrafi/