Nderimi i ikonës: Të shtunën në të gjitha lokalet e Prishtinës do të dëgjohet muzika e Nexhmije Pagarushës

Të premten (7 shkurt), në moshën 86 vjeçare ndërroi jetë ikona e muzikës shqiptare, Nexhmije Pagarusha, e cila e humbi luftën me një sëmundje të shkurtër.

Vdekja e ‘Bilbilit të muzikës shqipe’ është një humbje e madhe për artin në përgjithësi dhe gjithë shqiptarët, të cilat janë duke ndërmarrë iniciativa të ndryshme për ta nderuar jetën dhe veprën e saj.

Lexo po ashtu Kush ishte Nexhmije Pagarusha - artistja shqiptare e emëruar "Bilbili i muzikës shqipe"

Nesër (e shtunë), në të gjitha lokalet e kryeqytetit, në të njëjtën kohë, do të lëshohet muzika e legjendës sonë, tashmë të ndjerë.

“Shoqata e Gastronomëve të Prishtinës, në koordinim me Ministren e Kulturës, Rinisë dhe Sportit znj. Vlora Ismail Dumoshi, janë dakorduar që të vendosin një vepër simbolike për nder të vdekjes së ikonës shqiptare. Përherë, do të jehojë zëri i saj në kujtimet e bukura që la te ne”.

“Artistët jetojnë për të krijuar dhe madhështia e veprave të tyre matet përmes rrezes që përçon arti që ata i dedikojnë jetën. Prandaj amshimi i artistëve nuk është vdekje, meqë krijimtaria ua siguron përjetësinë tokësore që mundësohet nga kultivimi i përhershëm i artit të tyre. Nexhmije Pagarusha është një krijuese e kësaj përmase dhe konsumimi i vazhdueshëm i artit të saj do t’ia sigurojë përjetësinë”.

“Diva origjinale e trevave tona nesër do dëgjohet, në sinkron, në të gjitha lokalet e Prishtinës, në të njëjtën kohë, për të prodhuar një kontrast që bashkëvepron. Zëri i saj do shkrijë mërzinë tonë dhe në anën tjetër do ta ngrijë kujtimin për të në mendjet tona”, thuhet mes tjerash në faqen e Shoqatës së Gastronomëve të Prishtinës në Facebook. /Telegrafi/