Napoli dhe Galatasaray më në fund kanë arritur një marrëveshje të plotë për shitjen e sulmuesit nigerian Victor Osimhen, pas një periudhe huazimi jashtëzakonisht të suksesshme në Stamboll gjatë sezonit 2024/2025. Galatasaray ka këmbëngulur për ta transferuar Osimhen përfundimisht, pas formës së tij mbresëlënëse gjatë huazimit sezonin e kaluar, ku ai kontribuoi me 37 gola dhe tetë asistime në 41 paraqitje në të gjitha garat. Megjithëse Galatasaray pranoi të paguajë të plotë klauzolën e lirimit prej 75 milionë eurosh që ishte e vlefshme në kontratën e Osimhen gjatë pjesës së parë të korrikut, negociatat janë zvarritur për disa javë për shkak të mospajtimeve mbi strukturën dhe këstet e pagesës, si dhe kërkesës së Napolit për garanci zyrtare për pagesën. Sipas Football Italia, marrëveshja tashmë është përfunduar, dhe Galatasaray do të paguajë shumën e plotë prej 75 milionë euro deri në fund të vitit 2026.
Napoli do të përfitojë gjithashtu deri në 5 milionë euro në formë bonusesh dhe do të mbajë një klauzolë prej 10 për qind mbi shitjen e ardhshme të lojtarit. Për më tepër, marrëveshja përfshin edhe një ‘klauzolë anti-Serie A’, e cila ndalon Osimhen të bashkohet me një nga rivalët direkt të Napolit në Serie A për 24 muajt e ardhshëm./Telegrafi/
