Musliu: Asnjë nga aktakuzat e profilit të lartë, nuk përfundoi me aktgjykim dënues (Video)

Betim Musliu nga Instituti i Kosovës për Drejtësi (IKD), duke folur për korrupsionin, ka bërë një krahasim mes Kosovës dhe shteteve të zhvilluara.

Ai në “Debat Plus” me Ermal Pandurin, në RTV Dukagjini, ka thënë se zyrtarët nuk po kanë nevojë të përzihen në afera kriminale, pasi po e zhvatin buxhetin e shtetit përmes prokurimit.

“Ne ende vazhdojmë të korruptojmë me pesë euro dhe dhjetë euro, por tash një prej fenomeneve që është duke u zhvilluar është zhvatja e buxhetit publik. Pra zyrtarët nuk po kanë nevojë të përzihen në afera kriminale, apo të drogës, por përmes zyrave të prokurimit publik ata po i nxjerrin paratë sikur të ishin të xhepit të vet”, ka thënë Betim Musliu.

Duke folur për sistemin e drejtësisë në SHBA, Musliu ka thënë se atje agjensionet bëjnë garë në mes veti për luftimin e korrupsionit, përcjell Telegrafi.

“Ka shumë gjëra që mundë t’i mësojmë nga SHBA, duke filluar nga ndarja e pushteteve. Atje nuk ekziston vetëm një institucion që lufton korrupsionin, por janë disa agjensione të pavarura, që bëjnë garë në mes veti”, ka shtuar Musliu, duke dhënë edhe një shembull nëse një institucion atje nuk vepron.

“Nëse një institucion i prokurorit nuk vepron nëse ka fakte të mjaftueshme për ta zhvilluar një proces hetimor, atëherë në SHBA ekziston një agjension tjetër i pavarur, i cili njëjtë po ashtu merret me rastin, dhe bëhet një garë paralele, për ta vendosur para përgjegjësisë këdo që e ka shkelë ligjin”, ka treguar më tej Musliu.

Betim Musliu ka thënë se Lufta kundër korrupsionit varet vetëm nga vullneti politik.

“Lufta kundër korrupsionit dhe performanca e sistemit të drejtësisë lidhet me vullnetin politik. E ky vullnet deri më tani ka munguar në Kosovë”, ka shtuar më tej Betim Musliu.

Duke folur për akuzat ndaj zyrtarëve të lartë ai ka thënë si mundet të mos dënohet asnjë zyrtar i profilit të lartë.

“Asnjë nga aktakuzat e profilit të lartë, nuk ka mbërri me përfundua me aktgjykim përfundimtar dënues, që po i bjer që politika të gjitha aktakuzat i ka ngritë nga prokurorët mercenar”, ka thënë Musliu./Telegrafi/

https://www.facebook.com/tvdukagjiniofficial/videos/2218577351502341/