A mund të ketë tentim për destabilizim të situatës, pas arrestimeve nga Gjykata Speciale?

Në përgjithësi nuk do të kishte tentim për të destabilizuar situatën në Kosovë, në momentin e fillimit të arrestimeve të para të Gjykatës Speciale. Gjithsesi, ndonjë tentim edhe mund të ketë dhe kjo do të varet nga fakti se “kush do të ketë fatin e arrestimit”.

Sipas njohësit të çështjeve të sigurisë, Avni Islami, Gjykata Speciale pa dyshim se ka filluar t’i shqetësoj të gjithë protagonistët, madje edhe ata që po shtiren kinse nuk ia kanë frikën.

Në pyetjen e bërë nga Telegrafi se arrestimet nga kjo Gjykatë a do ta destabilizonin situatën në Kosovë Islami tha: “Krejt varet se kush do ta ketë ‘ fatin’ e arrestimit”.

Sipas tij, janë pak ato figura që do të mund ta destabilizonin vendin nëse arrestohen.

“Ai destabilizim do të zgjaste shkurt sepse këtu i kemi forcat e KFOR-it me institucione të cilat nuk do të lejojnë befasi eventuale. Rreziku i destabilizimit do të mund të vinte nga faktorët e jashtëm me implikimin direkt të Serbisë dhe indirekt të Rusisë”, ka thënë Islami për Telegrafin.

Ai gjithashtu tha se ka besim të plotë tek institucionet e Sigurisë së Kosovës, së bashku me KFOR-in dhe EULEX-in të cilët sipas tij, ata do të dinë ta menaxhojnë situatën në Kosovë.

Ndërsa, njohësi i çështjeve politike, Imer Mushkolaj, ka thënë se Gjykata Speciale ka në fokus individë që mund të kenë kryer krime në periudha të caktuara, e jo UÇK-në e as luftën e UÇK-së, siç po propagandohet.

Sipas tij, kjo gjykatë nuk e fyen luftën, përkundrazi, e pastron atë nga individë që mund të kenë bërë veprime kriminale.

“Andaj, reagimet e kujtdo qofshin, janë të panevojshme”, ka thënë Mushkolaj në një prononcim për Telegrafin.

Rregullorja e Procedurave dhe Provave me të cilën i hapë rrugë ngritjes së aktakuzave ndaj pjesëtarëve të UCK-së, është miratuar nga gjykatësit e Dhomave të Specializuara.

Mirëpo, kryetarja e Dhomave të Specializuara, Ekaterina Trendafilova, Rregulloren ia ka dërguar Dhomës së Specializuar të Gjykatës Kushtetuese për të parë nëse është në përputhje me Kushtetutën e Kosovës.

Ndryshe, dhoma e Specializuar ka afat deri në 30 ditë.

Rregullorja hyn në fuqi 7 ditë pasi Dhoma e Specializuar ta thotë fjalën e saj rreth kushtetutshmërisë. Pastaj Gjykata Speciale mund të ngrit aktakuzat. /Telegrafi/