Muja: Buxheti i vitit 2025 përfshin 3.6 miliardë euro, borxhi do të jetë 21.1% i GJDP-së

Kryetari i Komisionit për Buxhet, Punë dhe Transfere, Armend Muja ka thënë se shpenzimet buxhetore të propozuara në kuadër të ligjit përfshinë vlerën prej 3 miliardë e 607 milionë euro, duke thënë se mbështeten në të hyrat buxhetore në vlerë prej 3.3 miliardë euro,

“Nevoja për financim përfshinë një bilanc negativ prej 300 milionë euro. Borxhi i përgjithshëm bazuar në propozimin e ligjit për ndarjet buxhetore 2025, deri në fund të vitit 2025 parashihet të jetë 21.1% në raport me GJDP”, tha Muja.

Ai shtoi se shpenzimet pritet të jenë 1.2 miliardë euro në kategorinë e subvencioneve dhe transfereve, 916 milionë euro në paga dhe mëditje, 930 milionë euro për investime kapitale dhe 536 milionë euro për mallra dhe shërbime.

Muja tutje shtoi se sipas këtij projekt-buxheti, buxheti për nivelin qendror të jetë 2.8 miliardë euro, ndërkaq 788 milionë euro i dedikohen komunave.

Muja, ka deklaruar se prioritete të rëndësishme pritet të jen autostradat Prishtinë-Mitrovicë, Prishtinë-Podujevë, Prishtinë-Pejë, Prishtinë-Gjilan dhe Prizren-Tetovë.

Ai ka thënë se 100 milionë euro janë paraparë për barna esenciale, 145 milionë euro për fëmijë dhe lehona, 100 milionë për kulturë e sport.

Muja ka shtuar se për herë të parë, buxheti për Ministrinë e Drejtësisë dhe të gjithë sektorët pritet të jetë 120 milionë euro, 200 milionë euro për mbrojtje e 230 milionë euro për ministrinë e Punëve të Brendshme.

“Është evidente që të hyrat në katër vitet e fundit janë rritur për mbi 85 për qind ashtu si edhe shpenzimet”, ka shtuar ai. /Telegrafi/