Muhaxheri: Investimet gjatë mandatit tim në Pejë – më të mëdhatë që nga koha e partizanëve (Video)

Kryetari i Komunës së Pejës, Gazmend Muhaxheri – i cili është duke e synuar edhe mandatin e dytë në krye të kësaj komune – ka thënë se për katër vite me radhë ka bërë investimin më të madh – “që nga koha e partizanëve, respektivisht që nga viti 1944”.

Në një intervistë në TV Rrokum, ai tha se projekti Borea është duke u bërë realitet, ndërsa premtoi se në dhjetorin e vitit të ardhshëm aty mysafirët mund të nis skijim.

Kandidati i LDK-së për Pejën shtoi se ka realizuar 987 projekte, ku veçoi investimet në infrastrukturë (sipas tij, 307 kilometra rrugë në 62 vendbanime).

“Para mandatit tim, Peja kishte vetëm 279 kilometra rrugë”, tha ai. “Nga trupat ndriçues kemi arritur të vendosim 5,656 prej tyre – dy herë më tepër se në të kaluarën. Ndërsa, sa i përket kanalizimeve janë ndërtuar 60,000 metra. E, po aq punë e mirë është bërë edhe me rregullimin e infrastrukturës te Çarshia e Gjatë dhe Muri i Lumit, tha Muhaxheri”.

Muhaxheri ka përmendur edhe investimet në arsim, ku specifikoi ndërtimin e tri shkollave të mesme. Ndërkaq, kur është fjala te turizmi, deklaroi se është shumëfishuar numri i turistëve, falë investimeve në projektet si: Via Ferrata, Bukuroshja e Fjetur, Shtegu i Shëndetit etj.

“Bujqësia do të mbetet priroritet edhe në mandatin e radhës, meqë kemi bazë të mirë”, tha ai duke shtuar se gjatë mandatit të tij të dytë Peja do të jetë lider ekonomik në Kosovë. /Telegrafi/

https://youtu.be/Ho9Uc0VzjiI