Mrçella: Maqedonia deri më tani i ka përmbush rekomandimet e GRECO dhe nuk ka arsye të mos vazhdojë kështu

Deri më tani Maqedonia i ka përmbushur rekomandimet e Grupit të shteteve kundër korrupsionit (GRECO) dhe mendoj se nuk ka arsye që mos të jetë kështu në të ardhmen, ka deklaruar kryetari i GRECO, Marin Mrçella, i cili qëndron në Shkup ku merr pjesë në punëtorinë e organizuar nga Akademia e gjykatësve dhe prokurorëve publik „Pavel Shatev“, transmeton Telegrafi Maqedoni.

Ai pret që rekomandimet të përmbushen nga Maqedonia, ndërsa seanca plenare në të cilën do të bisedohet për Maqedoninë do të mbahet javën e fundit të qershorit.

“E di që Maqedonia ka pranuar shumë rekomandime. Tani jemi duke u marrë vetëm me njërën pjesë, e kjo është parandalimi i korrupsionit për sa u përket deputetëve, gjykatësve dhe prokurorëve dhe është vështirë të jepet çfarëdo vlerësimi për dy arsye. Si e para nuk e kemi shqyrtuar raportin, dhe si e dyta nuk bëjmë renditjen e shteteve, por përpiqemi që të përmbushen rekomandimet, kjo është më mirë, ka thënë Mrçella.

Drejtoresha e Akademisë së gjykatësve dhe prokurorëve publik, Aneta Arnaudova, thotë se sipas GRECO, në Maqedoni janë bërë reforma të mëdha në pjesën e legjislacionit penal kundër korrupsionit në përputhje me standardet e vendosura me dokumentet e Këshillit të Evropës.

“Procesi është në drejtim të një legjislacioni gjithëpërfshirës dhe të qëndrueshëm, ndërsa në drejtim të zhvillimit të mëtejmë të udhëzimeve për reforma të GRECO, me LPP-në e re është rtitur mundësia për ndjekje më efikase dhe gjykim të inkriminimeve ekzistuese dhe të reja për mitë marrje, ka theksuar Arnaudova.

Në punëtorinë dyditore marrin pjesë gjykatës, avokatë, prokurorë dhe përfaqësues të Komisionit shtetëror për parandalim të korrupsionit, të cilët informohen për përvojat kroate në pjesën e veprave penale korruptive./Telegrafi/