MPPS: Mungesa nga puna do të dëshmohet me vërtetim nga kopshti ose shkolla

Ministria e Punës dhe Politikës Sociale u bën thirrje të gjithë të punësuarve dhe punëdhënësve që t’u përmbahen me përpikëri masave që i miratoi Qeveria e Republikës së Maqedonisë, në seancën e mbajtur më dt. 10.3.2020 për të parandaluar përhapjen e COVID-19 (koronavirusi).

Çdo mosrespektim i rekomandimit për lirimin nga detyrimet e punës të një prej prindërve të fëmijëve deri në moshën 10 vjeç, sipas njoftimit të MPPS-së,  duhet të denoncohet në Inspektoratin Shtetëror të Punës në numrin e telefonit 151 31, njofton Telegrafi Maqedoni.

“Mungesat nga puna do të dëshmohen me vërtetime që do t’i lëshojnë kopshtet dhe shkollat fillore në emër të prindit – shfrytëzues i masës për lirim nga puna për shkak të kujdesit për fëmijën deri në moshën 10 vjeçare, në të cilat do të shënohet edhe periudha kohore për të cilën lëshohet ky vërtetim. Të njëjtat do të duhet të dorëzohen në sektorin për menaxhim me resurse njerëzore apo tek udhëheqësi/drejtori i institucionit/kompanisë në të cilën punojnë deri në afatin për përllogaritjen e pagës së ardhshme”, shprehen nga MPPS-ja.

MPPS ju bën thirrje të gjithë qytetarëve që t’u përmbahen rekomandimeve dhe se vetëm së bashku mund të mbrohemi dhe të mbrojmë shëndetin tonë të përbashkët.​

“Lidhur me ndërprerjen e punës së Qendrave ditore për përkujdesjen e fëmijëve me aftësi të kufizuara, nënvizojmë se lirimi nga aktivitetet e punës të prindërve të fëmijëve/personave me aftësi të kufizuar është zgjeruar edhe për prindërit e fëmijëve dhe të rinjve mbi moshën 10 vjeçare. Edhe këta prindër duhet të dorëzojnë vërtetim se personi është shfrytëzues i shërbimit të Qendrës ditore për personat e aftësi të kufizuara”, thuhet në njoftimin e MPPS-së./Telegrafi/