Ministrja e Integrimit vizitë në Shqipëri, koordinohen për proceset e integrimit

Ministrja e Integrimit Evropian, Mimoza Ahmetaj po qëndron në një vizitë zyrtare në Tiranë ku është takuar me ministrin e Punëve të Jashtme të Shqipërisë, Ditmir Bushati dhe homologen e saj, Klajda Gjosha.

Gjatë takimit ministrat diskutuan ambientin politik në kuadër të BE-së dhe zhvillimet e fundit politike në Kosovë dhe Shqipëri, përvojën e Shqipërisë në zbatimin e Marrëveshjes së Stabilizim Asociimit dhe shfrytëzimin e fondeve të BE-së për financimin e reformave të parapara me agjendën evropiane.

Në takim me ministrin Bushati, temë e diskutimit ishin zhvillimet aktuale në dy vendet tona, respektivisht avancimi me procesin e integrimit evropian.

Të dy ministrat u pajtuan që të rritet koordinimi ndërmjet dy institucioneve tona si për të avancuar me implementimin e Marrëveshjes së Stabilizim Asociimit ashtu edhe për të ecur përpara me agjendat evropiane të vendeve tona.

Ndërsa në takim me ministren Gjosha, u diskutua koordinimi ndërinstitucional për zbatimin e MSA-së, procesin e përafrimit dhe përkthimit të legjislacionit, si dhe programimin e fondeve te BE-se për të përkrahur reformat në kuadër të procesit integrues.