Komuna e Shtimes po e cilëson të rëndësishëm një projekt infrastrukturore të cilin pritet ta realizon ministria e Infrastrukturës. Punimet pritet të nisin në fund të kësaj jave (të premten) në një segment prej 8 kilometrash që lidh “Qafë Duhël-Topillë-Grajçevc-Papaz”.
“Ky projekt madhor, me vlerë 925 mijë euro, është një investim i rëndësishëm në infrastrukturën rrugore dhe një hap i madh drejt modernizimit të lidhjeve mes fshatrave”, tha kryetari Qemajl Aliu, i cili së bashku me zëvendësministrin e Infrastrukturës, Hysen Durmishi, kanë pranuar zyrtarisht kontratën për realizimin e punimeve.
Sipas njoftimit të komunës, asfaltimi i këtij segmenti do të ketë ndikim të drejtpërdrejtë në përmirësimin e kushteve të transportit për qytetarët, duke lehtësuar qasjen në shërbime dhe duke nxitur zhvillimin ekonomik të zonës. Punimet pritet të përfundojnë deri në sezonin veror. /Telegrafi/