Mësimi i edukatës seksuale, mbetet tabu në shkollat e Kosovës

Dhuna seksuale dhe ngacmimet seksuale mbeten ndër temat më pak të trajtuara në literaturën shkollore dhe se Lënda e Edukatës Seksuale duhet të përfshihet si lëndë e veçantë në kurrikulën shkollore.

Kështu u tha pas një hulumtimi të bërë nga organizata “Humanus Vita”. Ndërkaq, nga Ministria e Arsimit nuk kanë bërë të ditur nëse lënda e Edukatës Seksuale do të futet si lëndë e veçantë në kurrikulën shkollore.

Organizata “Humanus Vita”, ka prezantuar të gjeturat rreth hulumtimit të temave të edukatës seksuale në lëndën e biologjisë së klasës së 8-të të shkollave fillore në Komunë e Drenasit. Hulumtuesja e kësaj organizate, Valentina Bejtullahu, i tha Radio Kosovës së mësimdhënësit janë të pajtimit që lënda e edukatës seksuale të përfshihet si lëndë e veçantë në kurrikulën shkollore. Sipas saj, temat më pak të trajtuara mbeten dhuna seksuale dhe ngacmimi seksual, për të cilat ka interesim të lartë nga ana e nxënësve.

“Të gjeturat nga intervistat me mësimdhënës si dhe nga vëzhgimi i orëve mësimore të lëndës së biologjisë së klasës së 8-të, kanë spikatur disa sfida në trajtimin e temave të edukatës seksuale. Ndër to janë: mungesa e laboratorëve të lëndës së biologjisë, mjeteve konkretizuese dhe hapësirat e pamjaftueshme për trajtimin e temave të edukatës seksuale dhe për të përçuar mesazhet te nxënësit. Megjithatë, në kemi vëzhguar së nxënësit kanë shumë interesim për këto tema dhe kanë nevojë që të sigurohet një jetë e sigurt dhe e shëndosh seksuale për jetën e tyre”, deklaroi Bejtullahu.

Në lidhje më këtë çështje, Ministria e Arsimit në një përgjigje me shkrim për Radio Kosovën, ka bërë të ditur së edukata seksuale ligjërohet në shkolla nga klasa 1 deri në 12, por se a do të futet si lëndë e veçantë në kurrikulën shkollore, nuk kanë bërë të ditur.

“Për sa i përket informatave për shëndetin seksual dhe riprodhues, tashmë kjo temë është pjesë e planprogramit mësimor dhe ligjërohet në shkolla nga klasa 1-12 dhe si pjesë e zbatimit të saj, MASHT-i në bashkëpunim me grupin punues multisektorial, ka hartuar materiale mbështetëse si doracakë për mësimdhënësit në tri nivelet, duka filluar nga 1-5,6-9, 10-12, pastaj broshurën për prindër dhe udhëzuesin për fëmijët me nevoja të veçanta si dhe 12 video si materialë për vetëdijesim të fëmijëve duke filluar nga 1- 12 klasë. MASHT-i gjatë muajve tetor/nëntor ka realizuar shumë aktivitete sensibilizuese për edukimin seksual dhe shëndetin riprodhues me prindër, mësimdhënës në shkolla duke përfshirë këshillin e prindërve në nivel qendror dhe këshillat e prindërve në nivel shkolle. MASHT-i do të vazhdojë punën me aktivitete edhe për vitin 2024”m thuhet në përgjigjen e MASHTI-t.

Edhe njohës të arsimit në vazhdimësi vlerësojnë se edukimi seksual i të rinjve është i rëndësishëm, për arsye se informohen për temat të cilat vazhdojnë të jenë tabu në shoqëri. Edukimi seksual është i përfshirë si temë në disa lëndë siç janë Biologjia, Edukata qytetare dhe Edukata fizike.

Ndryshe Shkolla fillore “Astrit  Bytyqi” në Ferizaj është shkolla e vetme në Kosovë që lënda e Edukimit Seksual ligjërohet si lëndë e veçantë  një herë në javë.