Mbyllja e reparteve në spitalet e Maqedonisë, ministri premton punësime të infermiereve

Do të punësohen gjithsej 20 infermiere në të gjitha klinikat ku ka mungesë të stafit, deklaroi sot ministri i Shëndetësisë, Venko Filipçe.

Deklarata e tij vjen si pasojë e informatave se Reparti i Hematologjisë në Klinikën e Fëmijëve në Shkup, është mbyllur pikërisht për shkak të mungesës së stafit. Ministri pohoi se reparti u mbyll që të mos lejohet ndonjë improvizim, përcjell Telegrafi Maqedoni.

Lexo po ashtu Mungesë infermieresh në gjitha spitalet në Maqedoni

“Mungesa e infermiereve më së shumti është vërejtur gjatë periudhës së kaluar. Kemi bërë një analizë me Ministrinë e Punës dhe Politikës Sociale dhe identifikuam një numër të madh të infermiereve që janë pa punë. Kështu që, besoj se do të gjejmë staf i cili do të punojë në këto reparte. Nga ana tjetër, reparti u mbyll për të mos lejuar të ndodhë ndonjë improvizim, derisa nuk ka njerëz të mjaftueshëm”, tha Filipçe.

Pothuajse të gjitha institucionet shëndetësore po përballen me mungesë të stafit. Problemi më i madh janë infermieret. Spitali i Qytetit “8 Shtatori” në disa raste ka qenë i detyruar që ta përgjysmojë kapacitetin e tij./Telegrafi/