Mbrojtja e Mustafës nuk pajtohet që gjykimi të nis në mars, thotë se ju duhet kohë deri në gusht t’i përfundojnë hetimet

Julius Von Bone, avokati mbrojtës i Salih Mustafës ka paraqitur para gjykatësit Guillou se disa materiale janë dorëzuar vetëm në gjuhën angleze, dhe sipas tij kjo po i shkakton telashe klientit të tij.

“Disa nga materialet e nxjerra janë vetëm në gjuhën angleze dhe nuk janë në gjuhën shqipe”, ka thënë Von Bone.

Prokuroria tutje ka shtuar se të gjitha materialet janë dorëzuar në të dyja gjuhet, derisa ka pyetur mbrojtjen se për çfarë materiale saktë bëhet fjalë.

Mbrojtja tutje shtoi se do të ketë një alibi që do të paraqitet nga mbrojtja dhe do të ketë edhe dëshmitarë për këtë, shkruan Telegrafi.

Lexo po ashtu Prokuroria kërkon që çështja ndaj Salih Mustafës të fillojë në mars

“Presim që t’i përfundojmë intervistat me këta dëshimtarë afërisht brenda 2 muajsh dhe kjo ka të bëjë vetëm me alibinë”, ka thënë Von Bone.

Avokati ka shtuar se “është mirë që pasi t’i kemi përfunduar hetimet tona në një moment të themi që jemi gati për të filluar gjykimi”.

“Supozimi im është që gushti do të ishte muaji kur ne do t’i kishim përfunduar hetimet”, tha avokati Von Bone.

Kurse prokurori nuk u pajtua me këtë gjë, duke thënë se mbrojtja ka pasur kohë që t’i kryej hetimet.

“Qëndrimi jonë si Prokurori është që të gjithë të punojmë që gjykimi të filloj në mars të këtij viti”, tha prokurori.

Prokurori tutje ka shtuar se afatet kohore të paraqitura nga mbrojtja nuk duken të pranueshme për ta si prokurori. Prokuroria  ka propozuar që bashkë me mbrojtjen të ulen për t’i caktuar afatet kohore. /Telegrafi/