Mbi 100 ankesa për rrethin e dytë të zgjedhjeve lokale në Maqedoni

Aleanca për Shqiptarët, Lëvizja Besa dhe Lëvizja Popullore e Maqedonisë dërguan ankesa në Komisionin Shtetëror të Zgjedhjeve për raundin e dytë të zgjedhjeve lokale që u mbajtën të dielën, më 29 tetor.

Sipas KSHZ-së, në afatin që skadoi në orën 2 pas mesnate, Aleanca për Shqiptarët dërgoi 13 ankesa për Strugën. Lëvizja BESA dërgoi 89 ankesa, prej të cilave 86 janë për zgjedhjet në Çair, të dërguara bashkërisht me Aleancën për Shqiptarët dhe tre ankesa për Tetovën.

Një ankesë ka dërguar Lëvizja Popullore e Maqedonisë për votimet në Çashkë. Komisioni, pas pranimit të ankesave është i obliguar në afat prej 48 orësh të sjellë vendim. Kundër vendimit të KSHZ-së, mund të parashtrohet padi në Gjykatën Administrative në afat prej 24 orësh nga pranimi i vendimit.

Gjykata Administrative e Republikës së Maqedonisë, nga ana tjetër, për ankesën obligohet të sjellë vendim në afat prej 48 orësh pas pranimit të saj. Vendimet e Gjykatës Administrative janë përfundimtare. /Telegrafi/