Sport Futboll Ndërkombëtare

Mbappe ‘godet’ klubin francez, teksa flet për të ardhmen, PSG-në dhe ambicien për Topin e Artë

Para 2 vitesh

Pas marrjes së çmimit për lojtarin më të mirë francez të sezonit 2022/2023 të dhënë nga L’Equipe dhe France Football, Kylian Mbappe dha një intervistë për këto dy media, në të cilën ai analizoi sezonin e tij, shpjegoi ndjenjat e tij dhe tregoi ambicien e tij për të fituar gjithmonë.

Emri i Mbappes është më i përfoluri në këtë muaj, pasi ka vendosur të mos rinovojë kontratën dhe Paris Saint-Germain synon ta shesë këtë verë për të mos e lënë të largohet falas në verën e ardhshme.

Real Madridi ka qenë klubi që Mbappe është lidhur më së shumti dhe për këto thashetheme, të ardhmen, Topin e Artë, Ligën e Kampionëve dhe shumëçka tjetër ka folur vet Mbappe në një intervistë së fundmi.

“Sezoni i fundit në Ligue 1? Është shumë e thjeshtë, unë jam konkurrues, kur luaj, luaj për të fituar. Dhe nuk ka rëndësi me kë luaj, nuk ka rëndësi fanella ime, nuk ka rëndësi se ku, pavarësisht viteve, nuk kënaqem kurrë me fitoren. Shkoj me pushime, bëj një këndellje, rikuperoj energjinë dhe kthehem me urinë që e dinë të gjithë”, ka thënë fillimisht Mbappe për L’Equipe.

“Unë jam gjithmonë i pakënaqur, kështu që kurrë nuk jam i impresionuar me atë që bëj. Tashmë është çelësi i parë për të kuptuar veten sepse çdo gjë që bëj, i them vetes se mund ta bëj përsëri dhe më mirë. Unë kam këtë uri për të fituar”.

“Nuk dua të jem në një ekip vetëm për të marrë pjesë. Prandaj ndonjëherë njerëzit mendojnë se jam arrogant. Unë nuk kam frikë nga dështimi, është pjesë e karrierës së një futbollisti. Por unë kam bindjen e thellë se kam lindur për të fituar dhe dua t’ua tregoj të gjithëve”.

Mbappe foli edhe në lidhje me skuadrën e tij aktuale, PSG-në dhe dëshirën e paplotësuar ende për të fituar Ligën e Kampionëve.

“Nuk e di se çfarë i mungon PSG-së për të fituar Ligën e Kampionëve, kjo nuk është çështje për mua. Duhet të flasësh me njerëzit që bëjnë ekipin, që organizojnë skuadrën, që ndërtojnë këtë klub. Unë thjesht përpiqem të bëj punën time në mënyrën më të mirë të aftësive të mia. Isha lojtari më i mirë, golashënuesi më i mirë për vitin e pestë radhazi në Ligue 1”.

Topi i artë

Mbappe konsideron se të luajë në Ligue 1, një kampionat që nuk tërheq interesin e të tjerëve si ndoshta Liga Premier apo La Liga, nuk e ndihmon atë në votën për Topin e Artë, por ai shpreson ta fitojë atë një ditë.

“A i normalizojnë njerëzit paraqitjet e mia? Po, por në të njëjtën kohë nuk i fajësoj ata. Në Francë, njerëzit më kanë parë të rritem, më shohin gjatë gjithë kohës, në PSG çdo fundjavë ose me ekipin kombëtar. Dhe unë kam shënuar prej vitesh shumë gola. Pra, për njerëzit po bëhet diçka normale. Nuk jam ankuar asnjëherë se i banalizojnë paraqitjet e mia”.

“Mendoj se të luash për PSG-në nuk ndihmon shumë, sepse është një ekip i ndarë, një klub i ndarë. Pra, sigurisht, kjo tërheq thashethemet, por nuk më intereson sepse e di se çfarë bëj dhe si e bëj”, përfundon sulmuesi francez. /Telegrafi/