Pasi rinovoi kontratën me Interin, Beppe Marotta diskutoi rreth të ardhmes së sulmuesit Lautaro Martinez dhe asaj se çfarë shkoi keq me mbrojtësin Milan Skriniar.
Shefi i "Nerazzurrëve" së fundmi ka nënshkruar kontratë të re me klubin deri në qershor të vitit 2028, duke u konfirmuar në atë pozitë edhe për vitet në vazhdim.
Marotta ka qenë një figurë e rëndësishme që prej ardhjes së tij në dhjetor të vitit 2018, pasi ka ndihmuar Interin të ngjitet në majat e futbollit italian.
Ai luan një rol aktiv në afatin kalimtar për Interin së bashku me drejtorin sportiv Piero Ausilio, me dyshen që bëjnë përpjekje për të sjellur përforcimet e duhura për skuadrën e Simone Inzaghit, ani pse kanë një buxhet të limituar.
Në një intervistë për Calciomercato, Marotta ka diskutuar rolin dhe lidershipin e Lautaros në ekip.
“Lautaro është para se gjithash një futbollist shumë i mirë, por gjithashtu një baba shumë i mirë. Ai është një lojtar i cili bart vlera të rëndësishme, ai e dashuron Interin dhe Interi e dashuron atë”, ka thënë Marotta fillimisht.
“Ai dëshiron të qëndrojë dhe ne jemi të lumtur që e kemi atë. Sot ai është një nga lojtarët më të rëndësishëm sepse është kapiteni i skuadrës. Nëse ju e merrni shiritin, është sepse keni një diferencë të vogël në krahasim me pjesën tjetër “, vazhdoi ai.
Marotta nuk u la pa u pyetur edhe për kohën kur transferuan Cristiano Ronaldon tek Juventusi.
“Ai ishte një futbollist shumë i mirë, ai ende është dhe mbi të gjitha është një kampion i madh. Kampion është ai person i cili shpreh besimin e tij tek bashkëlojtarët”.
“Ai ishte lider i skuadrës, ishte më i famshmi dhe i shtyu të tjerët drejt suksesit”, u shpreh Marotta.
66-vjeçari shpjegoi po ashtu se çfarë shkoi keq me Skriniar i cili u largua si lojtar i lirë në drejtim të Paris Saint-Germainit gjatë verës.
“Kishte disa diferenca, disa vështirësi mes tij dhe Interit. Kjo bëri që të prishet marrëdhënia dhe miqësia që ekzistoi mes nesh. Rrugët tona u ndanë, ai shkoi në Paris, ne vazhduam tutje pa të”, dekaroi Marotta./Telegrafi/
