Malet e fshatit Sferkë të Klinës përfshihen nga zjarri, situata alarmante

Një situatë kritike po mbretëron në fshatin Sferkë të komunës së Klinës, ku malet janë përfshirë nga zjarri.

Drejtori i Shërbimeve Publike dhe Emergjencave në Klinë, Qëndrim Millaku, ka bërë të ditur se situata po përkeqësohet me shpejtësi.

“Deri para gjysmë ore, zjarri ishte larg shtëpive, por tani ka filluar të afrohet drejt tyre,” tha Millaku.

Në vendngjarje janë mobilizuar njësitet e zjarrfikësve për të kontrolluar situatën, por sfidat janë të mëdha.

“Po përballemi me zjarre të shumta dhe kemi kërkuar ndihmë nga Agjencia për Menaxhimin e Emergjencave, Forca e Sigurisë së Kosovës (FSK) dhe KFOR-i, por deri tani nuk kemi marrë asnjë përgjigje,” shtoi Millaku.

Gjendja është aq kritike sa që kërkesa për ndihmë është bërë edhe tek komunat fqinje.

“Kam telefonuar personalisht në Rahovec për ndihmë, por edhe ata janë të ngarkuar me zjarre në zonat e tyre dhe nuk kanë mundësi të na ndihmojnë,” shpjegoi ai.

Më herët, zjarret më të rënda janë raportuar në Prevallë, ku për të shuar flakët është dashur ndërhyrja e KFOR-it me helikopterë.

Zhvillimet në Sferkë mbeten nën vëzhgim, ndërsa zjarrfikësit dhe autoritetet lokale po përpiqen të parandalojnë përhapjen e mëtejshme të zjarrit dhe të mbrojnë shtëpitë dhe banorët.