​LVV nuk do ta votojë Planin zhvillimor të Prishtinës, qeverisja Rama akuzohet për shantazhe

Asamblistët komunal të Lëvizjes Vetëvendosje në Prishtinës kanë ritheksuar sot se nuk do të votojnë pro draft dokumentit të Planit Zhvillimor të Komunës (PZHK), pasi siç thonë ata ka shumë mangësi dhe se është në dëm të qytetarëve.

Sot me ftesën e Lidhjes Demokratike të Kosovës (LDK) dhe Aleancës për Ardhmërinë e Kosovës (AAK) është thirrur seancë e jashtëzakonshme e cila përmban dy pika, ndër to edhe miratimi i draft dokumentit për PZHK-në.

Kryetari i Grupit të asamblistëve të Lëvizjes Vetëvendosje në Prishtinë, Gëzim Sveçla tha se dokumenti i Planit Zhvillimor Komunal, ka të meta procedurale, administrative dhe përmbajtjesore.

“Si Lëvizje Vetëvendosje, si qendër e Prishtinës tashmë e kemi shprehur qëndrimin tonë për këtë çështje. Bëhet fjalë për dokumentin kryesor i cili i shërben planifikimit të qytetit në periudhën e ardhshme tetë vjeçare, por i cili fatkeqësisht përmban shumë të meta qoftë procedurale, administrative dhe përmbajtjesore…”, tha Sveçla.

Sipas tij, ky është mandati i tij i fundit, prandaj nuk është udhës dhe nuk është në rregull për Prishtinën dhe për zhvillimin e qytetit që një person i cili në praktikë e ka dëshmuar që nuk i shërben të mirës publike, nuk i shërben qytetarëve dhe nuk i shërben zhvillimit të qytetit ta determinojnë zhvillimin e qytetit për një periudhë kaq të gjatë.

“…Zoti Rama dhe subjekti i tij politik janë marrë me kontrata të tjera të dyshimta, një pjesë e madhe e të cilave siç tash e dini janë subjekt i hetimeve të Prokurorisë Speciale të Republikës së Kosovës dhe çfarë po ndodhë, kur po hyjmë në fazën e fundit të mandatit të tij, ai na e sjell një Plan zhvillimor Komunal, i cili ka të gjetura 28 vërejtje administrative, ligjore dhe substanciale nga Ministria e Mjedisit dhe Planifikimit Hapësinor”, tha Sveçla.

Ai tutje tha se  qeverisja aktuale në kryeqytet është qeverisje e shantazheve, bizneseve të fshehta dhe marrëveshjeve të dyshimta.

“Jo çdo gjë bëhet me pare..se ka parime dhe qëndrime në funksion të publikes…”, tha ndër të tjera ai.

Asamblisti tutje tha se qytetarët e Prishtinës nuk ia kanë borxh Përparim Ramës që interesat e veta dhe grupit përreth tij t’i mbulojë me një dokument të tillë të paligjshëm dhe të parregullt. /Telegrafi/